Sýningar í Gallerí Gróttu
31. maí 2018
Seltirningurinn Björk Ísaksdóttir er mörgum vel kunn og ekki síst fyrir listsköpun sína. Björg er fædd þann 31. Maí 1928 og hefur að mestu unnið við gerð leikhúsbúninga og við allskyns hönnun og saumaskap. Lengst af vann hún hjá Leikfélagi Reykjavíkur, við Þjóðleikhúsið, í New York og einnig í Svíþjóð þar sem hún vann m.a. í sænsku konungshöllinni. Samhliða vinnu sinni stundaði Björg nám í teikningu, málun og höggmyndagerð í Myndlistarskólanum í Reykjavík á árunum 1967-1977. Eftir 1978 stundaði hún nám í Svíþjóð, Finnlandi, New York og Ítalíu. Björg var með glerlistavinnustofu á Laugavegi 27 og hélt þar fjölda sýninga á gleri og málverkum. Björg hefur sýnt verk sín víða, bæði hérlendis og erlendis m.a. í Svíþjóð og Ítalíu og tekið þátt í fjölmörgum samsýningum. Björg var einn af stofnendum Myndlistaklúbbs Seltjarnarness sem starfaði frá árinu 1974.
Á samsýningunni sjö listamenn sýna listamenn verk sem tengjast á einn eða annan hátt sjálfstæði, hvort heldur sem er hugtakinu sjálfu, sjálfstæði einstaklingsins eða sjálfstæði þjóðar. Listamennirnir sjö nálgast viðfangsefnið á ólíkan hátt og er bæði um að ræða verk sem unnin hafa verið sérstaklega fyrir sýninguna sem og eldri verk. Listamennirnir koma allstaðar að af landinu en eiga það allir sameiginlegt að hafa verið valdir listamenn hátíðarinnar List án landamæra. Ísak Óli Sævarsson var valin listamaður hátíðarinnar árið 2012. Hann er í stöðugri þróun sem listamaður og listin þroskar hann sem einstakling. Ísak er afkastamikill listamaður og eru fjölmörg verka eftir hann í einkaeigu sem og í eigu hins opinbera um land allt. Ísak Óli vinnur helst með málverk og teikningar og er endurtekning áberandi stef í verkum hans.
Sýningin Sjö listamenn er styrkt af Fullveldishátíðinni og er hluti af dagskrá 100 ára Fullveldisafmælis Íslands.
Kristinn Örn Guðmundsson - TÍMAHJÓLIÐ
SÝNINGAROPNUN Í GALLERÍ GRÓTTU 12. apríl
Kristinn Örn Guðmundsson opnar ljósmyndasýningu sína Tímahjólið 12. apríl næstkomandi. Á sýningunni verða m.a. ljósmyndir sem sem listamaðurinn tók á miðaldardögum á Gásum við Eyjafjörð. Líf og starf fólks í Gásakaupstað miðalda er endurvakið með listrænu auga listamannsins.
Kristinn er með verslunarskólapróf fra Verslunarskóla Íslands og er tæknistúdent frá Tækniskóla Íslands. Hann stundaði nám hjá SAE Institute/Quantm College á Englandi í 3víddar hönnun og hreyfimyndagerð, þá tók hann einnig heimildamyndagerð frá dfg, (Documentary Filmmakers Group). Hann hefur unnið sem kvikmyndagerðamaður, grafískur hönnuður ásamt ýmsu öðru. Eitt af áhugamálum hans er ljósmyndun og stafræn myndvinnsla á þeim, þ.e.a.s. hann vinnur ljósmyndir sinar þannig að úr þeim gerir hann stílfærð listaverk.
Kristinn tók þátt í samsýningu með 73 alþjóðlegum listamönnum í San Benedeto del Tronto á Ítalíu 2017 þar sem hann sýndi ljósmyndaverk frá miðaldadögum á Gásum við Eyjafjörð, verslunarstað frá miðöldum. Þessi myndaröð frá Gásum er sýnd á sýningunni í Gallerí Gróttu ásamt öðrum listaverkum sem hann hefur unnið.
Sýningin stendur til 5. maí 2018.
Sigurborg Stefánsdóttir - VETRARMYNDIR
Unnur Birna og Sigurgeir Skafti flytja nokkur lög við opnunina.
Sigurborg hefur fengist við myndskreytingar og bókagerð og var kennari við Myndlista- og handíðaskóla Íslands 1989-2000 og stundakennari við Listaháskóla Íslands 2000 - 2011. Hún hefur bæði fengið styrki til námsdvalar í Bandaríkjunum og Japan. Hún hefur haldið 14 einkasýningar, á Íslandi, Danmörku og Ítalíu og tekið þátt í fjölda samsýninga víðsvegar um heim. Aðferðir við myndsköpun hennar eru ýmiss konar; málun, teikning, grafík, klippimyndir, ljósmyndir ofl. Myndefnið er fjölbreytt, ýmist fíguratíft eða nonfíguratíft.
Nánar um listamanninn:
Nám hjá Hans Chr Höjer listmálara í Kaupmannahöfn 1980-1984
Gestanemandi í Kunstakademiets arkitektskole, Visuel kommunikation 1980-1981
Gestanemandi í teiknikennslu í Köbenshavn Læreseminarium 1981-1982
Skolen for Brugskunst (Danmarks Designskole) í Kaupmannahöfn 1982-87,Teikni og grafík deild
og gestanám í textíldeid.
Haystack Mountain school of Crafts, Maine U.S.A. júlí 1990. Námskeið í bókagerð.
(Styrkur frá Íslenska-Ameríska félaginu ).
Artist-in Residence, 6 vikna námskeið í japönskum tréskurði, Japan 2001.( Styrkur frá Japanska ríkinu.)
16. nóvember 2017
Guðrún Einarsdóttir f. 1957 útskrifaðist frá málaradeild Myndlista- og handíðaskóla Íslands árið 1988. Hún stundaði einnig nám í fjöltæknideild 1988-89 við sama skóla. Síðan hefur Guðrún unnið óslitið að myndlist og sýnt reglulega hér heima og erlendis.
Verk Guðrúnar á sýningunni sýna ríka efniskennd og áþreifanlegt yfirborð fullt af smáatriðum. Viðfangsefnin eru náttúran og náttúruöflin, þar sem Guðrún beitir margvíslegum efnsitökum og vinnur með fjölbreytt birtingarform olíuefnanna.
www.geinars.com
Fiskislóð 45L, 101 Reykjavík, s. 699 2880
12. október 2017
7. september 2017
_hs.jpg "IYFAC Sýningaropnun Gallerí Grótta2")
_hs.jpg "IYFAC Sýningaropnun Gallerí Grótta1")
Myndlistarhópurinn IYFAC opnaði sýninguna Ég sagði það áður en þú gast sagt það í Gallerí Gróttu kl. 17.00 þann 7. september. Sýnendur eru Halla Birgisdóttir, Ragnheiður Harpa Leifsdóttir, Ragnheiður Maísól Sturludóttir, Sigrún Hlín Sigurðardóttir og Steinunn Lilja Emilsdóttir. Verkin á sýningunni eru unnin út frá vangaveltum um þungann og merkinguna í hversdagslegum hlutum og djúpstæða þörf fyrir að átta sig á öllu því sem smátt er í von um að fá botn í hið stóra. Gjörningur var fluttur við opnunina. Sýningin mun standa yfir í mánuð og eru allir velkomnir.
Um IYFAC:
IYFAC stendur fyrir International Young Female Artists Club. Við erum reyndar ekki mjög alþjóðlegar því allar erum við íslenskar. Eins erum við ekkert sérlega ungar (þótt okkur líði reyndar alltaf eins og 23 ára). Allar lítum við á okkur sem listrænar en komumst ekki upp með að vinna eingöngu við list og höfum þvi önnur starfsheiti. Svo er matsatriði hvort að hópinn mætti flokka sem klúbb. En við erum allar kvenkyns, þú getur verið viss um það. Sýningin okkar heitir Ég sagði það áður en þú gast sagt það sem vísar í þá tilhneigingu kvenna að reyna að finna út hvaða gagnrýni þær muni fá og afsaka sig fyrirfram. Nákvæmlega eins og við gerðum í þessum texta.
Um okkur:
Halla Birgisdóttir býr og starfar í Reykjavík. Hún er útskrifuð frá myndlistardeild Listaháskóla Íslands og hefur síðan þá tekið þátt í fjölmörgum samsýningum sem og haldið einkasýningar vítt um landið. Halla notar teikningar og texta til þess að skapa brotakennd frásagnarrými sem birtast áhorfendum síðan sem innsetningar, bókverk, veggteikningar, textíl-teikningar og kvik-teikningar. Hún kallar sig myndskáld. http://
Ragnheiður Harpa Leifsdóttir er sviðshöfundur. Hún lauk BA-námi úr Listaháskóla Íslands árið 2011 og MA-námi úr Háskóla Íslands í ritlist. Hún hefur starfað á ýmsum sviðum innan leikhúss og myndlistar, samið, sett upp og tekið þátt í fjölda gjörninga, sýninga og unnið innsetningar bæði á Íslandi og erlendis.
http://www.rahaharpa.com/
Ragnheiður Maísól Sturludóttir lauk BA-gráðu í myndlist frá Listaháskóla Íslands og hefur tekið þátt í mörgum samsýningum síðan. Hún er einnig meðlimur í Sirkus Íslands og Reykjavík Kabarett. Hún vinnur á mörkum myndlistar og sviðslistar og fjalla verkin hennar um töfrana í hversdeginum og mannlegri hegðun. https://www.behance.net/
Sigrún Hlín Sigurðardóttir er myndlistarkona og hefur unnið með bæði textíl og texta í verkum sínum, meðal annars í innsetningum, leikhúsi og útvarpi. Hún lauk BA-prófi í myndlist frá Listaháskóla Íslands og í íslensku frá Háskóla Íslands og lagði þar að auki stund á nám í textílhönnun við Myndlistaskólann í Reykjavík.
Steinunn Lilja Emilsdóttir er með BA-próf í guðfræði og MA-próf í ritlist frá Háskóla Íslands og BA-próf í myndlist frá Listaháskóla Íslands. Hún hefur tekið þátt í sýningum bæði sem listamaður og sýningarstjóri. Skrif eftir hana hafa birst í ýmsum tímaritum og safnritum. Hún leggur áherslu á texta í list sinni, bæði í verkunum sjálfum og sem innblástur.
Ljósmyndir tók Birkir Brynjarsson.
10. júní kl. 15 - Bleikur sandur
Laugardaginn 10. júní kl. 15 verður Aðalheiður Valgeirsdóttir með leiðsögn um sýningu sína Bleikur sandur sem nú stendur yfir í Gallerí Gróttu á Seltjarnarnesi.
Á sýningunni getur að líta málverk sem Aðalheiður hefur málað með olíu á striga á síðastliðnum tveimur árum. Á laugardaginn verður opið í Gallerí Gróttu frá kl. 11-16. Annar opnunartími er mánud.-fimmtud. 10-19 og föstud. 10-17. Sýningin stendur til 16. júní. Aðgangur er ókeypis.
https://www.facebook.com/GalleriGrotta/
24. maí 2017
______________________________
27. apríl 2017
Þetta vilja börnin sjá!
Í tilefni Barnamenningarhátíðar á Seltjarnarnesi var farandsýningin Þetta vilja börnin sjá!
sett upp í Gallerí Gróttu. Hátíðardagurinn hófst með opnun sýningarinnar kl. 10 um morguninn. Þar gat að líta myndir eftir 24 myndskreyta úr 32 barnabókum sem komu út árið 2016. Sýningunni lauk 19. maí.
Myndskreytar:
Andri Kjartan Andersen • Ari Hlynur Guðmundsson Yates • Auður Þórhallsdóttir • Bergrún Íris Sævarsdóttir • Brynhildur Jenný Bjarnadóttir • Elín Elísabet Einarsdóttir • Elsa Nielsen • Freydís Kristjánsdóttir • Hafsteinn Hafsteinsson • Halla Sólveig Þorgeirsdóttir • Heiðdís Helgadóttir • Katrín Matthíasdóttir • Kristín Arngrímsdóttir • Kristín Ragna Gunnarsdóttir • Lára Garðarsdóttir • Linda Ólafsdóttir • Lína Rut Wilberg • Logi Jes Kristjánsson • Lóa Hlín Hjálmtýsdóttir • María Sif Daníelsdóttir • Sigmundur Breiðfjörð Þorgeirsson • Sigrún Eldjárn • Þórey Mjallhvít H. Ómarsdóttir • Þórir Karl Bragason Celin
___________________________
22. mars 2017
S H I F T á HönnunarMars
Fimm íslenskir og sex skoskir hönnuðir koma í fyrsta sinn saman í nýrri, tilraunakenndri sýningu í Gallerí Gróttu. Sýningin ber yfirskriftina SHIFT en hönnuðirnir sem verk eiga á sýningunni vinna verk sín í leir, tré, eðalmálma og textíl en meginþema verkanna liggur í breyttri áherslu, stefnu eða fókus.
Shift er verkefni sem er sprottið upp úr HönnunarMars og eru aðstandendurnir með fjölbreyttan bakgrunn. Tilgangur sýningarinnar er að gefa ólíkum hönnuðunum kost á faglegu samtali og útbúa farveg þar sem þeir geta veitt hver öðrum innblástur. Fyrsta sýningarverkefni hópsins er í Gallerí Gróttu en með áframhaldandi samstarfi í gegnum röð sýninga og viðburða í Skotlandi og á Íslandi munu hönnuðirnir fá tækifæri til að kynnast heimkynnum, umhverfi, hæfileikum, reynslu, efnisnotkun og tækni hvers annars.
Samstarfsverkefnið er í senn vettvangur fyrir ferskar hugmyndir og nýja nálgun í skapandi framleiðslu. Því er einnig ætlað að efla og búa til tengingar við nýja markhópa og stuðla að nánari tengslum milli landanna.
Sýningin stendur til 22. apríl.
Stjörnuglópar - Stefán Boulter
Meginuppistaða sýningarinnar er myndröð eða fjölskylda af verkum, sem hafa verið unnin á síðustu tveimur árum. Grunnstef þeirra eru rauðmáluð andlit kvenna sem virðast vera á hreyfingu og beina sjónum sínum í átt að himinhvolfinu. Rauði liturinn hefur margvíslega táknræna skírskotun, en er einnig þekktur sem litur lífsins, hugrekkis og viljastyrks. Þannig búa verk Stefáns yfir táknmyndum, sem eru frásagnarlegs eðlis og byggja á persónulegri reynslu og þekktum, fornum minnum.
Hugleiðingar um náttúruna eru Stefáni ofarlega í huga og endurspeglast í dýrum, viðveru hluta og áru þeirra. Stefán hefur víða leitað fanga við gerð verkanna en þau eru meðal annars innblásin af verkum listmálarans George Catlin ( 1796-1872 ) sem ferðaðist meðal innfæddra í Norður Ameríku snemma á 19. öld og málaði fólkið sem byggðu álfuna áður en heimsálfan var öll numin Evrópubúum. Þessi horfni heimur hefur löngum vakið forvitni listamannsins allt frá barnæsku, er hann ungur gruflaði í bókum föður síns.
Stefán Jóhann Boulter er fæddur í Reykjavík árið 1970. Hann lærði grafíska hönnun í Tempe, Arizona í Bandaríkjunum, var við listnám í Flórens á Ítalíu og varð síðar aðstoðarmaður Odds Nerdrum í Noregi og á Íslandi. Stefán hefur sýnt í listasöfnum og galleríum bæði hér heima og erlendis, haldið einkasýningar og tekið þátt í samsýningum. Stefán er búsettur á Akureyri og kennir með reglulegu millibili við Myndlistarskólann á Akureyri.
Sýningunni lýkur 11. mars.
_hs_GG.jpg "Álengd, Gallerí Grótta, Anna Júlía_Corda Solitaria_Spiritual")
Álengd - Anna Júlía Friðbjörnsdóttir
Sýningunni lýkur 4. febrúar.
Útskýringar - Halldór Ragnarsson
Kveikjuna að sýningunni Útskýringar, sem opnuð verður í Gallerí Gróttu fimmtudaginn 8. desember kl. 17, rekur listamaðurinn Halldór Ragnarsson til átaks á vegum SÍM sem nefnist Við borgum myndlistarmönnum, ásamt svari úr tölvupóstasamskiptum á milli Halldórs og sviðsstjóra menningarsviðs Seltjarnarnesbæjar. Í þeim fékk listamaðurinn höfnun við fyrirspurn sinni um það hvort Seltjarnarnesbær hygðist greiða honum efniskostnað eða laun vegna fyrirhugaðrar sýningar í Gallerí Gróttu.[1] Höfnunin virkaði myndrænt á Halldór sem kaus að vélrita svarið upp og vinna það áfram eins og um listaverk væri að ræða. Upphaflega hugmynd Halldórs var að kanna möguleg mörk á milli innihalds og útkomu. Eftir að hafa lokið verkinu umhverfðist svarið í nokkurs konar útskýringu á verkinu en var um leið forsenda þess. Niðurstaðan varð þannig að grunnstefi sýningarinnar, Útskýringar.
Halldór Ragnarsson er fæddur 1981 í Reykjavík. Hann lauk B.A. gráðu (2007) og M.A. gráðu (2014) frá myndlistardeild Listaháskóla Íslands eftir að hafa numið heimspeki við Háskóla Íslands. Hann hefur tekið þátt í fjölda samsýninga bæði hérlendis og erlendis. Útskýringar er hans ellefta einkasýning.
11. nóvember 2016
Sjónarhorn - leit að formi - Anna Rún Tryggvadóttir
Hinn eilífi núningur huglægrar og hlutlægrar þekkingar er útgangspunktur verkanna á sýningu Önnu Rúnar í Gallerí Gróttu. Þar getur að líta verk úr rannsóknarferli sem fjallar um það hvernig ólík sjónarhorn hafa áhrif á túlkunarmöguleika viðfangsefnis - sem í þessu tilfelli eru geometrísk form. 
6. október 2016
Hugform - máluð og klippt - Messíana Tómasdóttir
Verkin, sem unnin eru á síðastliðnum tveimur árum, byggjast á klippimyndatækni þar sem form og grunnar eru máluð með akríllitum á pappír. Form, liti og myndbyggingu sækir Messíana í innri veruleika og hugræna lifun. Myndir hennar eru ekki aðeins leikur með skæri og form heldur bera í sér andlegan boðskap og viðvist sem snerta áhorfandann á heilandi hátt.
Sýningarstjóri er dóttir Messíönu, listfræðingurinn Ásdís Ólafsdóttir.
Messíana stundaði nám í myndlist, leikmynda- og búningahönnun og brúðuleikhúsi hér á Íslandi, í Danmörku og í Frakklandi. Hún er höfundur að leikmyndum og búningum um 80 leiksýninga, ópera og sjónvarpsverka hér á landi og erlendis. Hún hefur haldið 15 myndlistarsýningar auk samsýninga og haldið námskeið og fyrirlestra um litafræði og brúðuleikhús hér heima, á Norðurlöndunum og víðar. Messíana hefur notið fjölda starfs- náms- og ferðastyrkja og var Borgarlistamaður Reykjavíkur 1983, Bæjarlistamaður Seltjarnarness 2003 og Heiðurslistamaður Félags leikmynda- og búningahöfunda 2014.
Sýningin stendur til 4. nóvember og er opin mán-fim 10-19, fös 10-17 og lau 14-17.
Við opnun sýningarinnar og alla laugardaga kl. 14 sýnir Messíana leikbrúðuverk, samtal sitt við bláu stúlkuna, en Messíana fullgerði verk um hana sem Borgarlistamaður.
8. september 2016 -
Nema fuglinn fljúgandi - Ragnhildur Ágústsdóttir
28. júlí 2016 - Málaðar klippimyndir -Sigurður Örlygsson
2. júní 2016
NÆR-FJÆR - Árni Rúnar Sverrisson
4. maí 2016
Recollection - Theresa Himmer
Miðvikudaginn 4. maí kl. 17 verður opnuð í Gallerí Gróttu sýning á verkum listamannsins og arkitektsins Theresu Himmer. Um er að ræða nýja verkaheild sem samanstendur af ritverki, sem ber sama heiti og sýningin og tveimur ljósmyndaseríum sem tengjast innbyrðis. Theresa á að baki myndlistarnám frá School of Visual Arts og Whitney Museum í New York og arkitektanám frá arkitektaskólanum í Árósum. Verk hennar hafa verið sýnd á samsýningum víða um heim og hér heima.
7. apríl
Ferð andans í frumskógi efnisins - Daði Guðbjörnsson
Daði Guðbjörnsson í Gallerí Gróttu – Fimmtudag 7. apríl kl. 17
Listmálarinn Daði Guðbjörnsson (1954) hefur þegar skipað sér á bekk með athyglisverðustu myndlistamönnum sinnar kynslóðar. Hann hefur farið ótroðnar slóðir í listsköpun sinni og skapað sér sérstæðan og persónulegan stíl þar sem hugmyndir, tákn og tilvitanir eru honum óþrjótandi viðfangsefni.
Á sýningunni hans, sem opnuð verður í Gallerí Gróttu fimmtudaginn 7. apríl kl. 17, kannar Daði nýjar lendur málaralistarinnar þar sem hann vinnur með kunnuleg tákn úr verkum sínum beint á ljósmyndir. Sýningin nefnist Ferð andans í frumskógi efnisins en þar skoðar listamaðurinn samhengið á milli lífsins og ferðalags sem bæði fela í sér að ná áfangastað sem oft er ekki fyrirsjáanlegur. Eftir nám við Myndlistaskóla Reykjavíkur og Myndlista- og handíðaskóla Íslands nam Daði við Rijksakademi van Beldende Kunsten í Amsterdam til ársins 1984. Hann hefur haldið fjölda samsýninga og einkasýninga, oftast á Íslandi en einnig erlendis.
Eftir Daða liggja bókverk og bókaskreytingar og stærstu listasöfn þjóðarinnar eiga verk eftir hann. Árið 1993 gaf Listasafn Reykjavíkur út veglega sýningaskrá um listamanninn.
FRÍMÍNÚTUR - Þórunn Árnadóttir
Þórunn Árnadóttir sýnir nýjar viðbætur við vörulínuna sína "Sipp og Hoj!" sem unnin er í samstarfi við Egersund netaverkstæði á Eskifirði, Jónsver saumastofu á Vopnafirði og Þórhall Árnason smið á Egilsstöðum.
Þema vörulínunnar er "frímínútur" og í henni fléttast hefðbundið netagerðarhandverk og efni frá netaverkstæðinu saman við Austfirsk náttúruefni eins og lerki úr Hallormsstaðaskógi og hreindýraleður. Vörurnar eru allar hannaðar með það að markmiði að nýta staðbundið hráefni og handverk Austurlands á þann hátt að auðvelt sé að framleiða þær.
"Sipp og Hoj" var upphaflega frumsýnd á Hönnunarmars 2014 í Spark Design Space undir samstarfsverkefninu "Austurland: Designs from Nowhere" sem snerist um að rannsaka möguleika til smáframleiðslu á
Austurlandi.Verkefnið hlaut Hönnunarverðlaun Íslands árið 2014.
PRESTAR OG PRJÁL - Sturla Már Jónsson
Sturla Már Jónsson (1947) nam trésmíði og síðan húsgagna- og innanhússhönnun við London College og Furniture. Hann hefur hannað innréttingar í hús af öllum gerðum og hannað húsgögn fyrir helstu húsgagnaframleiðendur landsins í meira en tvo áratugi.
Sturla hefur einbeitt sér að hönnun húsmuna fyrir fjöldaframleiðslu og eru húsgögn hans notuð af þúsundum fólks á degi hverjum. Hann hefur verið fastagestur á Hönnunarmars undanfarin ár og unnið til ýmissa verðlauna fyrir hönnun sína.
Á sýningunni í Gallerí Gróttu sýnir Sturla á sér aðra hlið og bregður á leik í hönnun hluta sem hann smíðar sjálfur sérstaklega fyrir sýninguna. Þetta eru hugmyndir sem hafa legið í skúffu í skissuformi og ekki gefist tími til að sinna fyrr en nú. Hlutirnir eiga samhljóm hvað notkun og form varðar en samt er hver hlutur einstakur og ekki endilega reiknað
með að smíði hans verði endurtekin. Smíðað er úr uppáhalds efni Sturlu: gegheilum við og málmi.
11. febrúar 2016
Reykjavík 1985-1990 - Húbert Nói Jóhannesson
Reykjavík 1985-1990 er yfirskrift sýningar Húberts Nóa Jóhannessonar sem verður opnuð í Gallerí Gróttu fimmtudaginn 11. febrúar kl. 17. Á sýningunni eru nokkur verka Húberts Nóa frá árunum 1985-1990 og hafa sum þeirra ekki verið sýnd áður opinberlega. Verkin eru af stöðum í Reykjavík sem málaðir eru eftir minni en strax á námsárum sínum var það leiðarstef listamannsins að færa umhverfið, byggingarlist og landslag inn í manneskjuna og yfirfæra það aftur út í umhverfið, hafandi staldrað við um stund í efnaferli líkamans.
Á þeim tíma, sem verkin vísa til, kom upp á yfirborðið stefna í myndlist er nefndist neo geo eða ný geometria, sem er m.a. kennd við listamennina Helmut Federle, John Armleder, Gerwald Rockenschaub og Franz Graf. Áhrifa stefnunnar gætti talsvert hjá ungum myndlistarmönnum sem voru að hasla sér völl á Íslandi um miðjan níunda áratuginn og margir snérust á sveif með henni einkum eftir gestakennslu Helmut Federle við MHÍ 1984.
Myndlistarmaðurinn Húbert Nói felldi þessa stefnu að sínum myndheimi þar sem borgarumhverfi og landslag er einfaldað í geometrisk form. Framsetning og viðfangsefni eru persónuleg en sjálfsprottin nálgun við listsköpun var ein meginstefa í hugmyndafræði nýja málverksins og pönksins, sem voru nánast samtíða neo geo stefnunni.
Hugmyndalist (concept) var allsráðandi í listheimi áttunda áratugarins og voru verk Húberts Nóa, rómantísk og upphafin, meðvitað samtal eða andsvar við stefnuna eins og hún birtist honum. Í viðtali sem tekið var við Húbert Nóa í Þjóðviljanum 1. ágúst 1987 sagði hann um verkin sín: „Þetta eru hús í borginni, Skólavörðuhæðin, Elliheimilið Grund…Þjóðminjasafnið …….En ég mála þetta eftir minni, svona eftir að myndin af húsinu eða staðnum er búin að gerjast í undirmeðvitundinni í dálítinn tíma”. Til að undirstrika að upplifunin hafi farið í gegnum vefi líkamans lýsir Húbert Nói pensilskrift verkanna lagskiptri og gagnsærri þannig í texta sýningarskrár (Gallerí Sævars Karls 1990):
„Tími, tilfinningar, minningar hafa ákveðið gegnsæi: Hugsanir leggjast hver yfir aðra, þar er upplifunin, eilítið á skjön við hinn ytri veruleika… “
Samspil innri og ytri heims hefur verið viðfangsefni manna um aldir microcosmos og macrocosmos en Húbert Nói skoðar með aðferð sinni meðvitað færsluna milli þessara heima. Fyrirmynd verkanna er ekki hinn ytri heimur beint heldur minningin um hann, hún er síðan færð út í ytri heiminn í formi listaverks og verður þannig hluti af honum.
Heiti verkanna hér er oft skilgreint með götuheiti eða götunúmeri viðfangsefnisins, minningarinnar. Síðar á ferlinum táknar Húbert Nói staðsetningar með hnattstöðu, lengdar- og breiddarbaugum, en með þeirri nálgun verður landslagsmálverk að rúmfræði eða geometriu. Sýningarsalurinn sem mótíf eða viðfangsefni kemur inn í myndheim Húberts Nóa 1985 og staðsetningarverk (site specific ) unnin í sýningarrými mynda óslitið ferli í höfundarverkinu. Með þessum verkum og síðar „málverkum af málverkum” gerir hann minni áhorfandans að beinum þátttakanda í ferlinu milli fyrirmyndar /eftirmyndar og hreyfingarinnar milli rýmis hins innri heims og rýmis hins ytri heims. Í verkum Húberts er geometrian myndlíking (metafora) fyrir innviði manneskjunnar. Að nota minnið við gerð listaverks er að setja upplifun hennar í forgrunn, kortleggja hinn innri heim og staðsetja og skoða hugsanaferli. Minnið er þannig hin persónulega upplifun en á sama tíma sammannlegt fyrirbæri (collective).
10. janúar 2016
#einádag - Elsa Nielsen Bæjarlistamaður Seltjarnarness
Elsa Nielsen grafískur hönnuður og myndlistarmaður var í dag útnefnd Bæjarlistamaður Seltjarnarness. Hún er tuttugasti Seltirningurinn til að hljóta nafnbótina.
Elsa hefur sýnt og sannað með verkum sínum að hún er meðal okkar fremstu hönnuða í dag. Viðfangsefni hennar eru fjölbreytt og hafa hlotið verðskuldaða athygli hvort sem er á sviði grafískrar hönnunar, merkjahönnunar, auglýsingaherferða, málaralistar, stafrænnar myndvinnslu, teikninga, myndskreytinga, frímerkjahönnunar eða bókaútgáfu. Þannig vermdi litabók hennar Íslensk litadýrð efstu sæti bóksölulista undir lok síðasta árs. Mörg hundruð manns fylgdust af áhuga með dagbókarfærslum hennar á Instagram og Facebook undir yfirskriftinni #einádag, þar sem hún skrásetti líf sitt með því að teikna eina mynd á dag allt árið um kring. Í tilefni af útnefningunni hefur verið opnuð sýning á öllum dagbókarfærslunum 365 í Gallerí Gróttu og stendur sýningin yfir til 5. febrúar.
Elsa er fædd í Reykjavík árið 1974. Hún útskrifaðist sem grafískur hönnuður frá Listaháskóla Íslands árið 1999. Hún starfaði í 13 ár sem hönnunarstjóri á auglýsingastofu ENNEMM en frá september 2013 hefur hún rekið sitt eigið hönnunarfyrirtæki, Nielsen hönnunarstofu. Hún býr á Seltjarnarnesi ásamt eiginmanni og þremur börnum.
Á sviði málaralistarinnar hefur Elsa einkum einbeitt sér að því að mála uppstækkaðan grafískan myndflöt á striga með akrýllitum. Verkunum ljær hún dýpt með því að byggja flötinn upp með sparsli og sandi. Þó að málverk Elsu standi sjálfstæð sýna þau glöggt hvernig Elsu tekst að færa margra ára reynslu og kunnáttu með grafíska miðlun yfir á annað stig.
Strax á námsárum sínum fór Elsa að sýna verk sín og á nú að baki fjölda sam- og einkasýninga á sviði málaralistar. Á síðustu tveimur einkasýningum Elsu í Gallerí Gróttu og Mokka-Kaffi sýndi hún svo ljósmyndir unnar með stafrænni tækni. Þannig vann Elsa með mörg helstu kennileiti Seltjarnarness og Reykjavíkurborgar og setti í nýjan og ævintýralegan búning. Verkin hafa hvarvetna vakið athygli og verið seld utan sem innanlands.
Elsa er einn af fáum frímerkjateiknurum landsins. Hún er félagi í FÍT (Félag íslenskra teiknara) og gegndi þar stjórnarsetu frá 2010-2011. Hún er fyrrum félagi SÍM (Sambands íslenskra myndlistarmanna) og hefur unnið við ýmis dómarastörf innan FÍT og einnig fyrir ÍMARK (samtök markaðsfólks á Íslandi). Í dag situr hún í stjórn SÍÓ ( Sambandi íslenskra Ólympíufara).
Elsa hefur hlotið margar viðurkenningar og verðlaun fyrir grafíska hönnun, bæði hérlendis og erlendis, en skemmst er að minnast tilnefningu til Íslensku bókmenntaverðlaunanna 2013 fyrir Brosbókina, barnabók sem hún myndskreytti, hannaði og er meðhöfundur að. Að auki hefur hún myndskreytt og komið að útgáfu fjölmargra annarra barna- og unglingabóka.
Farsæll ferill og velgengni Elsu hefur ekki einskorðast við sköpun á sviði hönnunar og lista, en margir þekkja hana betur fyrir afrek hennar á sviði íþrótta þar sem hún hampaði margsinnis Íslandsmeistaratitli í badminton og var fulltrúi Íslands í einliðaleik á Ólympíuleikunum í tvígang.
Menningarnefnd Seltjarnarness var einróma í vali á Bæjarlistamanninum 2016. Elsa hefur sýnt að hún er vel að nafnbótinni komin og Seltirningar mega vera stoltir af að eiga jafn hæfileikaríkan einstakling innan sinna raða. Auk nafnbótarinnar hlýtur Bæjarlistamaðurinn verðlaunafé að upphæð einni milljón króna. Við útnefninguna tilkynnti Elsa að nafnbótinni fylgdi mikill heiður og að eitt af verkefnum hennar á árinu væri að miðla og vinna með skólabörnum á Nesinu.
Gallerí Grótta er til húsa á Eiðistorgi, 2. hæð og er það opið mánudaga-fimmtudaga kl. 10-19 og föstudaga kl. 10-17. Fyrsta laugardag sýningarinnar, 16. janúar verður enn fremur opið frá kl. 11-16.
Fyrrum bæjarlistamenn Seltjarnarness eru:
Helgi Hrafn Jónsson, tónlistarmaður 2015
Ari Bragi Kárason, trompetleikari 2014
Sigríður Heimisdóttir, hönnuður 2013
Jóhann G. Jóhannsson, leikari 2012
Birna Hallgrímsdóttir, píanóleikari 2011
Freyja Gunnlaugsdóttir, klarínettuleikari 2010
Ragnheiður Steindórsdóttir, leikkona 2009
Kristín Gunnlaugsdóttir, myndlistarkona 2008
Jóhann Helgason, tónlistarmaður 2007
Sigríður Þorvaldsdóttir, leikari 2006
Auður Hafsteinsdóttir, fiðluleikari 2005
Margrét Helga Jóhannsdóttir, leikkona 2004
Ásbjörn Morthens (Bubbi), tónlistarmaður 2002
Messíana Tómasdóttir, myndlistarkona 2001
Rúna Gísladóttir, myndlistarkona 2000
Guðrún Einarsdóttir, listmálari 1999
Ragna Ingimundardóttir, leirlistakona 1998
Herdís Tómasdóttir, veflistakona 1997
Gunnar Kvaran, sellóleikari 1996
10. desember 2015
Portrett og landslag – Kristján Jónsson
12. nóvember 2015
Sýningaropnun - Farvegir vatns – Samsýning þriggja systra
Thorlacius systurnar þrjár Ingileif, Áslaug og Sigrún gengu allar í Ísaksskóla, Æfingaskólann og Menntaskólann við Hamrahlíð en völdu ólíkar leiðir þegar kom að háskólanámi. Þær áttu eftir að sameinast aftur undir merkjum myndlistarinnar; útskrifaðar úr Myndlista- og handíðaskóla Íslands og Listaháskóla Íslands auk þess að hafa sótt sér framhaldsmenntun í myndlist og tengdum greinum.
Nú sameinast systurnar þrjár í fyrsta sinn á samsýningu, sem opnuð verður í Gallerí Gróttu fimmtudaginn 12. nóvember kl. 17 og velta fyrir sér áhrifum vatns út frá fagurfræðilegu sjónarmiði, nýtingu þess og krafti.
Ingileif og Áslaug eiga fjölmargar sýningar að baki en Sigrún sýnir hér í fyrsta sinn opinberlega eftir útskrift. Hún útskrifaðist frá Listaháskóla Íslands á síðasta ári þar sem hún vakti athygli á því hvernig sveppir geta unnið eitur úr jarðvegi.
Ingileif Thorlacius
Vatnið er rauður þráður í höfundarverki Ingileifar, bæði sem myndefni og miðill. Við upphaf ferils síns málaði hún stór olíumálverk af vatni í stríðum straumum. Með tímanum sneri hún sér æ meir að vatnslit. Um leið varð myndefnið naumara og litunum fækkaði. Síðustu verkin hennar eru einföld rannsókn á ferðalagi vatnsins um pappírinn. Myndirnar á sýningunni falla í þann flokk.
Áslaug Thorlacius
Áslaug notar teikninguna sem rannsóknartæki. Með henni lærir hún ekki eingöngu að þekkja yfirborðið heldur öðlast hún djúpa persónulega vitneskju um innri gerð viðfangsefnisins. Hún sýnir blýantsteikningar og röð blekmynda af vestfirskum fjallahvilftum, giljum og klettabeltum sem vatn og aðrir kraftar náttúrunnar hafa mótað.
Sigrún Thorlacius
Verk Sigrúnar er hugvekja um votlendi. Íslendingar hafa ræst fram mýrar af miklum ákafa og þurrkað upp meirihluta votlendissvæða á láglendi í nafni landnýtingar. Hnattræn áhrif þessara aðgerða eru mun meiri en flestir gera sér grein fyrir. Á sýningunni túlkar hún vísindalegar niðurstöður íslenskra sérfræðinga. Með því vill hún vekja til umhugsunar um hvar við stöndum og hvert við stefnum í meðferð og nýtingu vatns, lands og náttúrugæða.
Um systurnar/listamennina
Ingileif fæddist 5. ágúst 1961, Áslaug 11. september 1963 og Sigrún 10. febrúar 1968. Allar gengu í Ísaksskóla, Æfingaskólann og Menntaskólann við Hamrahlíð en Ingileif lauk stúdentsprófi 1981, Áslaug 1983 og Sigrún 1988.
Ingileif
Ingileif las bókmenntafræði við HÍ í eitt ár að loknu stúdentsprófi en fór svo í Myndlista- og handíðaskóla Íslands og lauk málaradeild 1986. Hún stundaði framhaldsnám við Jan van Eyck Akademie í Maastricht í Hollandi 1986-88, tók diplómapróf í listkennslufræðum frá LHÍ 2004 og hóf meistaranám í menningar- og menntastjórnun við Háskólann á Bifröst haustið 2005. Þar lauk hún öllum kúrsum en átti meistaraverkefnið eftir.
Ingileif fékk hálfs árs listamannalaun árið 1989. Hún var stundakennari við Myndlista- og handíðaskóla Íslands, Valand listaháskólann í Gautaborg og Listaháskóla Íslands. Hún vann við fræðsludeild Listasafns Reykjavíkur árin 1997-2003 og kenndi einn vetur við Ljósafossskóla eftir kennsluréttindanámið. Árið 2005-6 var hún framkvæmdastjóri Textílseturs Íslands á Blönduósi. Ingileif lést 22. mars 2010.
Ingileif hélt fimm einkasýningar á níu árum, eina í Maastricht, aðra í Ásmundarsal og þrjár í Nýlistasafninu en hún var mjög virk í starfi félagsins og sat þar um tíma í stjórn. Hún tók þátt í átta samsýningum á Íslandi og í Svíþjóð og sýndi auk þess í tvígang ásamt Áslaugu systur sinni. Í janúar 2014 stóð fjölskylda hennar fyrir yfirlitssýningu á verkum hennar í Listasafni ASÍ undir yfirskriftinni Myndir Ingileifar. Af því tilefni gaf Eyja - útgáfufélag út bók með sama nafni.
Áslaug
Áslaug var við rússneskunám í Sovétríkjunum árið 1984-85. Hóf nám við Myndlista- og handíðaskóla Íslands 1987 og lauk þaðan námi við fjöltæknideild árið 1991. Hún lauk BA gráðu í rússnesku og bókmenntafræði 1993 og diplómaprófi í listkennslufræðum frá LHÍ 2004.
Áslaug var framkvæmdastjóri Samtaka um kvennalista árin 1995-2000. Samhliða því var hún formaður stjórnar Nýlistasafnsins í Reykjavík 1995-97 og myndlistargagnrýnandi DV 1997-2000. Hún starfaði á skrifstofu Myndlistaskólans í Reykjavík árin 2001-3 og var formaður Sambands Íslenskra myndlistarmanna 2002-9 samhliða kennslu við Melaskóla 2004-11. Hún var prófdómari útskriftarverkefna í myndlistardeild Listaháskóla Íslands vorin 2001 og 2004, kenndi námskeið við myndlistardeild Háskólans í Xiamen í Kína og hefur kennt rússneska listasögu við rússneskudeild Háskóla Íslands frá 2009. Áslaug sneri aftur til starfa við Myndlistaskólann í Reykjavík vorið 2012 og hefur verið skólastjóri skólans frá júní 2014.
Áslaug hefur tekið þátt í yfir 20 samsýningum og haldið annað eins af einkasýningum og sýningum í samstarfi við fjölskyldu sína og Ingileifu systur sína. Hún dvaldi í gestavinnustofu í Kína haustið 2006 og í Kjarvalsstofu í París í ársbyrjun 2013. Áslaug hefur fengið samanlagt eins og hálfs árs listamannalaun og hlaut sérstaka viðurkenningu fyrir verk sín á Vatnslitatvíæringnum í Kaunas árið 2012. Hún gerði skúlptúra fyrir verkið Vits er þörf á Háskólatorgi sem Finnur Arnar vann fyrir Háskóla Íslands og haustið 2014 vann hún verkefni fyrir Listskreytingarsjóð í móttöku göngudeild geðdeildar Landspítalans á Kleppi.
Sigrún
Sigrún lauk BS gráðu í líffræði frá Háskóla Íslands í júní 1993. Hún stundaði nám á listnámsbraut Iðnskólans í Hafnarfirði 2008 -2012 og lauk BA gráðu í vöruhönnun frá Listaháskóla Íslands í júní 2015.
Sigrún hefur starfað í Fjölskyldu- og húsdýragarðinum frá 1993. Fyrstu árin í fræðsludeild garðsins þar sem aðalhlutverk hennar var að fræða og útbúa efni fyrir nemendur í skipulögðu fræðslustarfi, sem og fyrir gesti garðsins. Frá 1997 hefur hún sinnt starfi aðstoðarforstöðumanns garðsins. Samhliða námi við LHí (2012 – 2015) var hún í hlutastarfi en er nú aftur komin í fullt starf.
Á námsárunum hefur Sigrún tekið þátt í nemendasýningum, fyrst á vorsýningum Iðnskólans í Hafnarfirði og síðar sýningum Listaháskóla Íslands, síðast á útskriftarsýningu skólans í Hafnarhúsinu vorið 2015. Þess utan tók hún þátt í samsýningu 3. árs vöruhönnunarnema í Gallerí Tukt á hönnunarmars 2015. Farvegir vatns er fyrsta sýning Sigrúnar að lokinni útskrift.
Skoða veggspjald15.10.2015
Sýningaropnun - Taktur í 100 ár 15. október kl. 17:00
Taktur í 100 ár er sýning sem varpar ljósi á baráttusöngva kvenna síðustu 100 ár. Um hvað fjölluðu baráttusöngvar fyrir um liðlegri öld og hvernig hafa þeir þróast til dagsins í dag.
Leikonan Arndís Hrönn Egilsdóttir fór í hlutverk framtíðarkonunnar og sýndi klæðnað hennar eftir 100 ár, sem Sigurlaug Brynjúfsdóttir nemandi í Való hannaði og útfærði með hjálp kennara og fulltrúa úr félagsstarfi aldraðra.
Kvenréttindabaráttan með augum nokkurra nemanda í Való kynnt í myndum, texta, ljóðum og bókverkum. Verkefnin voru unnin í samstarfi við sýningarstjóra og kennara.
Sýningarstjóri Sigurlaug Arnardóttir. Sýningin var unnin í tilefni af 100 ára kosningarafmæli kvenna.
Sýningin var hluti af menningarhátíð Seltjarnarness. Formaður menningarnefndar Kartín Pálsdóttir setti hátíðina. Félagar úr Kammerkór Seltjarnarness sungu nokkur baráttulög. Veitingar í boði. Allir velkomnir.
24. september 2015
Dagbjört Drífa Thorlacius
27. ágúst 2015
Sýningaropnun - Finnbogi Pétursson
.
Finnbogi lærði við Myndlista- og handíðaskóla Íslands og síðan við Jan Van Eyck Akademíuna í Hollandi. Hann hefur sýnt víða um heim og var fulltrúi Íslands á Feneyjatvíæringnum árið 2001.
Opið mán.-fim. 10-19, fös. 10-17, laugardag 29. og sunnudag 30. ágúst kl. 13-17.
13. maí 2015
Daníel Magnússon - Perpetual Youth
Perpetual Youth er yfirskrift sýningar Daníels sem hann tileinkar vini sínum og kollega Birgi Andréssyni 1955-2007.
Verkin eru óður til innibirtunnar sem uppistendur af fluorperu ljósi og glóperum en dagsljós er víkjandi. Það er gert til að draga fram þá einustu vetrarbirtu sem borgarbúar njóta í híbýlum sínum á vetrarmánuðum.
Val á formum og litum í viðfangi þessara verka eru tekið með tilliti til dramans og þagnarinnar. Þau eru fulltrúar fyrir gæjur og njósn plebeans um vanhelga staði og vísana til Euclidiskrar rúmfræði og leikhússins. Verkin eru upphafning hins hlutlausa og samofna umhverfis til frásagnar um efri sannindi.
Mat Dekenskloppen
Skoða veggspjald
_________________________________
9. apríl 2015
Tryggvi Þórhallsson - Apríl-Grimmastur mánuða
Apríl – Grimmastur mánuða er yfirskrift vatnslitasýningar Tryggva Þórhallssonar (f.1962) sem verður opnuð í Gallerí Gróttu fimmtudaginn 9. apríl kl. 17:30. Tryggvi tileinkar aprílmánuði verk sín en hann er kunnur fyrir viðkvæm vatnslitaverk þar sem hann leitast við að fanga hin ólíku birtubrigði íslenskrar náttúru. Tryggvi stundaði nám við Myndlista- og handíðaskóla Íslands 1984 – 1988 og brautskráðist frá grafíkdeild. Hann er félagi í Íslenskri grafík.
Sýningin er opin má-fim 10-19 og fö 10-17.
Aðgangur ókeypis.
_________________________________
12. mars 2015
Hönnunarmars 2015
Hadda Fjóla Reykdal & Hlín Reykdal í Gallerí GróttuSysturnar Hadda Fjóla Reykdal listmálari og Hlín Reykdal hönnuður vinna báðar út frá hughrifum úr náttúrunni.
Á sýningu þeirra í Gallerí Gróttu skoða þær hvernig hugmyndir þeirra mætast og mótast og verða að samspili í ólíkum miðlum verkanna.
Hadda Fjóla og Hlín verða með leiðsögn um sýninguna 13. mars kl. 15-17 og 14. og 15. mars kl. 13-15.
Sýningin stendur til 31. mars.
Sofa Complex - Theresa HimmerSofa Complex eða Sófa Kompleksið er ný innsetning ætlað unglingum sem Theresa Himmer arkitekt og myndlistarmaður hefur gert fyrir Bókasafn Seltjarnarness. Í rýminu mætast hönnun, arkitektúr og myndlist. Mikið mótunarferli liggur að baki innsetningu Theresu en um er að ræða stílhreint lestrarrými eða landslag sem miðar að því að mæta ólíkri samskiptaþörf og -hegðan ungmenna. Innsetningin hverfist um sex sætiseiningar sem gefa til kynna röð ólíkra samfunda. Í leikandi landslaginu er hægt að dvelja einn með sjálfum sér, eiga góða stund með félögunum, fara á trúnó, taka sér hvíld frá vini eða hjúfra sig upp að honum. Geómetrísk form innsetningarinnar eru hönnuð fyrir líkama í hvíldarstöðu; sitjandi, hallandi eða liggjandi með fæturna lárét eða lóðrétt. Algjört jafnvægi ríkir í innsetningunni, þar er hvorki miðja né hápunktur sem skapar jafnræði innan hópsins og ýtir undir lýðræðisleg samskipti.
Sófa kompleksið er smíðað úr viði og klætt með sérprentuðu teppi frá hinum virta EGE teppaframleiðenda í Danmörku, sem styrkti verkefnið. Mynstur teppisins gerði Theresa sérstaklega fyrir rýmið.
Reykjavíkurdætur rappa kl. 18
Allir velkomnir.
Opnunartími:
Formleg opnun fimmtudaginn 12. mars kl. 17
Mánudaga – fimmtudaga 10-19
Föstudaga 10-17
Helgina 14. og 15. mars 13-17
_________________________________
6. febrúar 2015
Safnanótt 2015
Nýr og glæsilegur sýningarsalur, Gallerí Grótta, verður opnaður á Safnanótt.