Te og tónlist
Te og tónlist er samstarfsverkefni bókasafnsins og Tónlistarskóla Seltjarnarness. Ætlunin er að Te og tónlist séu í boði á bókasafninu kl. 17:30 fyrsta mánudag í mánuði yfir vetrartímann. Kennarar Tónlistarskólans eða lengra komnir nemendur mæta á Miðjuna og leika fyrir gesti í allt að 30 mínútur.
03.12. 2012 Strengjasveit Tónlistarskóla Seltjarnarness leikur undir stjórn Helgu Þórarinsdóttur. Fluttur verður Brandenburgarkonsert nr 3 og jólalög.
05.11. 2012 Tveir píanókennarar við Tónlistarskóla Seltjarnarness þær Helga Laufey Finnbogadóttir og Dagný Björgvinsdóttir leika fjórhent á píanó.
01.10. 2012 Te og tónlist var hluti var Listaviku Bókasafnsins 2012. Tvær á palli með einum kalli... fluttu uppáhaldslögin sín úr kvikmyndum. Tríóið skipa þau Helga Þórarinsdóttir á víólu, Edda Þórarinsdóttir, leikkona sem söng og kynnti dagskrána og Kristján Hrannar Pálsson sem lék á píanó.
07.05. 2012 Það voru tveir nemendur sem leika á síðustu Te og tónlistartónleikunum í vetur. Annars vegar Björgvin Hjálmarsson sem lék á saxófón við undirleik Helgu Laufeyjar Finnbogadóttur á píanó. Þau leika lög eftir Young, Schwartz og Jobim. Hins vegar Eva Björk Davíðsdóttir píanónemandi sem söng og lék undir á píanó lög eftir Adele og Bob Dylan.
05.03. 2012 Tveir ungir og efnilegir gítarleikarar léku á Te og tónlist tónleikum á safninu 5. Mars. Þeir heita Magnús Orri Dagsson og Pétur Jónsson. Á efnisskrá voru verk eftir J.S. Bach, M. Lobet, J.Bernambucho, J. Cardoso. Umsjón með tónleikunum hafði Hinrik Bjarnason.
06.02.2012 Nemendur undir stjórn Guðjóns Þorlákssonar kontrabassaleikara og kennara við Tónlistarskóla Seltjarnarness léku jazz. Tónlistarmennirnir voru Rósa Kolbeinsdóttir, píanó, Guðrún Halla Jóhannsdóttir, söngur og Sigurbjörg Jósepsdóttir, kontrabassi.
05.12.2011 Strengjasveit Tónlistarskóla Seltjarnarness lék undir stjórn Helgu Þórarinsdóttur víóluleikar.
07.11.2011 Samleikur Jóns Guðmundssonar flautuleikara og kennara við Tónlistarskóla Seltjarnarness og Arnhildar Valgarðsdóttur píanóleikara. Þau léku Börnene spiller eftir danska tónskáldið C. Nielsen (1865-1931), Þrjár andrár eftir Atli Ingólfsson (1962), Tilbrigði við stef eftir Rossini eftir pólska tónskáldið Chopin (1810-1849), Sunstreams eftir breska flautuleikarann og tónskáldið Ian Clark (1964), Romansa eftir franska tónskáldið Saint Saens (1835-1921) og loks Andante KV. 315 eftir Mozart (1756-1791).
03.10.2011Tónleikar sem hluti af Menningar- og listahátíð Seltjarnarness 2011. Freyja Gunnlaugsdóttir lék á klarinett og Tinna Þorsteinsdóttir á píanó. Þær fluttu rómönsu eftir Marie Elisabeth von Sachsen Meiningen (1853-1923) en rómansan er eitt þekktasta verk Marie Elisabeth. Einnig fluttu þær tvo þætti úr verki eftir ungverska tónskáldið Leó Weiner (1885-1960) og að lokum Sex rúmenska dansa eftir ungverksa tónskáldið Béla Bartók (1881-1945).
02.05.2011 Síðustu tónleikar vetrarins var Mozart í aðalhlutverki. Selnestríóið - þau Auður Edda Erlendsdóttir, klarínett, Stefanía Bergljót Stefánsdóttir, víóla og Halldór Víkingsson, píanó - lék Kegelstatt tríóið í Es-dúr, KV 498 fyrir
klarinett, víólu og píanó. Kegelstatt tríóið er samið í Vín 5. ágúst 1786. Nafnið þýðir Keilustaður, og vísar til staðar þar sem spiluð var keila, eða leikur sem var undanfari nútíma keilu. Mozart hefur væntanlega samið verkið í huganum um leið og hann lék keilu. En hann hafði þann undraverða hæfileika að geta fullskapað tónverk í huganum án þess að setja stafkrók á blað, jafnvel verk fyrir heila sinfóníuhljómsveit. - Mozart varð mjög hrifinn af klarinettinu og skrifaði mörg verk fyrir það, þá var hann góður víóluleikari og náttúrulega virtúós sem píanóleikari.
En á undan Kegelstatt tríóinu lék Halldór píanóverk eftir Mozart, sem hann samdi upphaflega fyrir tvö klarinett og fagott en umritaði fyrir píanó seint á ferli sínum.
Halldór er kennari við Tónlistarskóla Seltjarnarness, en Auður og Stefanía nemendur skólans. Auður Edda Erlendsdóttir er nemandi Hauks Gröndal klarinettuleikara, og Stefanía Bergljót Stefánsdóttir er nemandi Helgu Þórarinsdóttur víóluleikara.
04.04.2011 Á apríltónleikunum tónleikaraðarinnar Te og tónlist á Bókasafni Seltjarnarness þann 4. apríl kl. 17:30 eru það fjórir píanónemendur og einn sellónemandi sem leika fyrir gesti. Þau leika fjölbreytt verk eftir J.S. Bach, Oscar Peterson, Edvard Grieg og Sergei Rachmaninoff. Píanóleikararnir eru Helga Þórunn Óttarsdóttir, Einar Helgi Jóhannsson, Berglind Kjartansdóttir og Anna Bergljót Gunnarsdóttir og sellóleikarinn er Unnur Jónsdóttir. Píanóleikararnir eru nemendur Helgu Laufeyjar Finnbogadóttur og Aðalheiðar Eggertsdóttur við Tónlistarskóla Seltjarnarness.
07.03.2011Það voru Helga Þórarinsdóttir og Dagný Björgvinsdóttir sem léku saman á víólu og píanó.
Á efnisskrá voru Elegie fyrir víólu og píanó eftir Rússann Alexander Glazunov (1865-1936), tvær Ave Maríur önnur eftir Franz Schubert (1797-1828) og hin eftir Sigvaldi Kaldalóns (1881-1946) auk Máríuvers Páls Ísólfssonar (1893-1974). Í lokin léku þær fimm franska dansa eftir Marin Marais (1656-1728).
07.02.2011 Á þessum fyrstu tónleikum ársins í tónleikaröðinni Te og tónlist verður gítar í forgrunni. Hinrik Bjarnason gítarleikari leikur þá ásamt tveimur nemendum sínum á framhaldsstigi, þeim Magnúsi Orra Dagssyni og Hjalta Ragnarssyni. Þeir leika aðallega Suður ameríska og spænska tónlist.
Auk þeirra kemur Brynhildur Magnúsdóttir þverflautuleikari í heimsókn og leikur með Magnúsi Orra í einu verki. Brynhildur er einnig nemandi á framhaldsstigi og er Jón Guðmundsson kennari hennar.
06.12.2010 Strengjasveit Tónlistarskóla Seltjarnarness leikur undir stjórn Helgu Þórarinsdóttur.
Hljómsveitin leikur meðal annars nokkur lög úr Töfraflautunni eftir Wolfgang Amadeus Mozart (1756 –1791) og Jólakonsert eftir ítalska fiðluleikarann og tónskáldið Corelli (1653 – 1713). Stjórnandi hljómsveitarinn er Helga Þórarinsdóttir, víóluleikari. Helga hefur kennt við Tónlistarskóla Seltjarnarness frá 1999. Hún stundaði nám við Royal Northern College of Music í Manchester og síðar hjá George Neikrug í Boston. Hún hóf störf hjá Sinfóníuhljómsveit Íslands árið 1980 og hefur verið í stöðu leiðandi víóluleikara frá árinu 1983.
01.11.2010 Fjórir trompetnemendur Kára Húnfjörð Einarssonar úr Tónlistarskóla Seltjarnarness, þau Sæmundur Rögnvaldsson, Hildur Vala Hjaltadóttir, Jóhannes Hilmarsson og Gunnar Kolbeinsson léku tvö verk hvert við undirleik píanóleikaranna Helgu Laufeyjar Finnbogadóttur og Dagnýjar Björgvinsdóttur. Á efnisskrá voru meðal annars Preludía eftir Gershwin, Trumpeter´s Lullaby, Haydn konsert No II, Kanon Pachelbells, Vocalisa og Square-Dance.
04. 10. 2010 Fyrstu tónleikar haustsins voru 4. október. Þá lék Halldór Víkingsson, píanókennari á Bösendorfer flygil safnsins verk eftir Clementi, Jón Leifs, Rachmaninoff og Béla Bartók.
Lengsta verkið var nær óþekkt sónata eftir Muzio Clementi (1752-1832). Flest verk hans féllu í gleymsku ef frá eru skilin nokkur smáverk (sónatínur), sem notuð eru í píanókennslu. En eftir Clementi-árið 2002 hefur orðið nokkur vakning fyrir Clementi, og fjölgar nú hljóðritunum á verkum hans jafnt og þétt. Halldór kynntist bandarískum píanóleikara, Christopher Sager, sem mikið hefur rannsakað verk Clementis og flutt þau, og fékk hjá honum aðstoð varðandi sónötur Clementis.
Segja má að verk Jóns Leifs hafi einnig verið gleymd og grafin þar til fyrir um 20 árum að útgáfa hófst á þeim hjá Chandos og BIS útgáfunum. Kvikmyndin Tár úr steini fjallar um ævi hans. – Halldór lék þrjú píanóverk eftir Jón Leifs á tónleikunum. Eitt þeirra, Vökudraumur, er til í handriti og er í kvikmyndinni. Það sker sig nokkuð úr öðrum verkum Jóns enda er þetta æskuverk, samið 1913. Hin tvö verkin voru gefin út saman á sama ópusnúmeri, op. 2. Valse lento er hægur vals, þar eru átök milli dúr- og mollhljóma, sem stundum renna saman. Íslensk prelúdía byggir á tvísöngslaginu Ísland farsælda frón, og er það flutt óbreytt í hægri hendi.
Verkin eftir Rachmaninoff og Bartók eru vel þekkt og sívinsæl. Prelúdía Rachmaninoffs er ljóðræn og íðilfögur, en Allegro barbaro eftir Béla Bartók olli fádæma hneykslun þegar það var frumflutt, enda er verkið algjör steypa. Það er nú talið undanfari Vorblóts Stravinskíjs þar sem ungri stúlku er fórnað. Allegro barbaro vísar á ruddalega framtíð þar sem menningin er horfin og aðeins barbarismi er eftir. Þykir Bartók hafa verið forspár, því verkið er samið árið 1911, en það virðist frekar tilheyra verkum sem samin voru eftir heimstyrjöldina síðari - þegar trúin á fullkomleika mannsins og eilífa framþróun hafði beðið nokkurn hnekki.
Halldór var nemandi nafna síns Haraldssonar í píanóleik, eftir að hafa verið hjá Lofti S. Loftssyni og Einari Markússyni, og útskrifaðist úr píanókennaradeild Tónlistarskólans í Reykjavík 1982. Hann lagði einnig stund á þýsku, íslensku og almenn málvísindi við Háskóla Íslands. Halldór hef komið fram við ýmis tækifæri og m.a. haldið píanóeinleikstónleika á kirkjulistahátíð Seltjarnarneskirkju.
03. 05. 2010 Á síðustu tónleikum vetrarins, í Te og tónlist, 3. maí lék Anna Bergljót Gunnarsdóttir, 18 ára píanóleikari og nemandi Tónlistarskóla Seltjarnarness. Anna Bergljót spilaði þrjú verk Prelúdíu og fúgu í d moll eftir þýska tónskáldið J. S. Bach (1685-1750). Verkið er skrifað 1722, sónötu í C dúr, KV. 545 eftir Austurríkismanninn W. A. Mozart (1756-1791). Sónatan er í þremur köflum, allegro, andante og rondo. Síðasta verkið sem Anna Bergljót spilaði var Etýða í As dúr op. 25, nr. 1 eftir Pólverjann F. Chopin (1810-1849) sem hann samdi árið 1836. Kennari Önnu Bergljótar í Tónlistarskólanum er Aðalheiður Eggertsdóttir deildarstjóri píanókennaradeildar tónlistarskólans.
12. 04. 2010 Tónleikar aprílmánaðar voru þann 12. apríl 2010. Þá léku þrír nemendur Tónlistarskóla Seltjarnarness fyrir gesti. Þau heita Björgvin Ragnar Hjálmarsson sem lék á tenór-saxófón, Auður Edda Erlendsdóttir á klarínett og Bergur Þórisson á básúnu. Á efnisskránni voru þekktir djassstandardar svo sem St. James Infirmary, Ornithology eftir saxófónleikarann Carlie Parker (1920 – 1955), Concert Key Chord Progressions eftir Miles Davis (1926 –1991), Puttin´ on the Ritz eftir Irving Berlin (1888 – 1989), Vivo Sonhandoo (Dreamer) og How Insensitive eftir Braselíumanninn Anonio Carlos Jobim (1927-1994). Með þeim léku kennararnir Guðjón Þorláksson á bassa og Helga Laufey Finnbogadóttir á píanó. Þetta voru nemendur Hauks Gröndal.
01. 03. 2010 Flautuleikarinn Jón Guðmundsson leikur á þverflautu við píanóundirleik Aðalheiðar Eggertsdóttur mánudaginn 1. mars 2010 kl. 17:30. Dagskrána byggðu þau í kringum Siciliönur eftir Bach (1685-1750), Austurríkismanninn Fritz Kreitzler (1875–1962), Frakkann Gabriel Faure (1845-1924) auk siciliönu og allegro úr sónötu í F-dúr eftir Handel (1685–1759). Auk þess spiluðu þau Aríu eftir Purcell, rómönsu fyrir flautu og píanó eftir Svissneska tónskáldið Honnegger (1892 –1955) og millispil úr Dimmalimm Atla Heimis Sveinssonar.
02. 02. 2010 Annan febrúar 2010 var síðan komið að einleik Hinriks Bjarnasonar á gítar. Á efnisskrá voru etýður eftir spænsku tónskáldin og gítarleikarana Francisco Tarrega (1852-1909) og Fernando Sor (1778-1839). Einnig lék hann Rómönsu Anon og verk eftir ítalska tónskáldið og gítarleikarann Matteo Carcassi (1792-1853), Brasilíumennina Heitor Villa-lobos (1887-1959) og João Pernambuco (1983-1947).
04. 01. 2010 Í upphafi nýs árs 4. janúar 2010 léku Sólrún Gunnarsdóttir og Sólveig Thoroddsen saman á fiðlu og hörpu.
14. 12. 2009 Jólatónleikar þar sem Hljómsveit Tónlistarskóla Seltjarnarness lék jólatónlist voru 14. desember 2009. Stjórnandi sveitarinnar er Helga Þórarinsdóttir, lágfiðluleikari.
07. 12. 2009 7. desember 2009 lék Dixilandsveit Árna Ísleifssonar – Í sveitinni eru: Árni Ísleifsson, Sverrir Sveinsson, Guðmundur Nordal, Björn Björnsson, Þórarinn Óskarsson, Ronie Hultgren, Sigurður Þórarinsson og Friðrik Theodórsson.
03. 11. 2009 Þann þriðja nóvember komu til okkar þrjár stúlkur úr Tónlistarskóla Seltjarnarness, þær Rósa Kolbeinsdóttir, píanó, Guðrún Jóhannsdóttir, kontrabassi og Sigurbjörg María Jósepsdóttir, söngur. Þær fluttu gamla jassstandarda, áhorfendum til mikillar ánægju.
05. 10. 2009 Fimmta október voru það Helga Þórarinsdóttir, víóluleikari og Dagný Björgvinsdóttir píanóleikari sem léku saman Sónötu eftir Þórð Magnússon, Vocalise opus 34 nr 14 eftir Rachmaninov og Næturljóð eftir Luise Adolpha Le Bean. Mikil ánægja var með tónleikana.
02. 03. 2009 Fyrstu tónleikarnir í röðinni Te og tónlist voru mánudaginn 2. mars 2009. Þá voru það tónlistarmennirnir Helga Laufey Finnbogadóttir og Guðjón Þorláksson sem léku saman á páinó og kontrabassa.