Jónsmessuhátíð

Andi fortíðar og sköpunarkraftur nútíðar mætast á Jónsmessuhátíð Seltirninga sem haldin verður hátíðleg fimmtudaginn 23. júní. Fjölskyldufólk er sérstaklega boðið velkomið.

Safnast verður saman við hákarlaskúrinn við Norðurströnd. Gestum boðið að reka inn nefið og gæða sér á hnossgæti úr skúrnum. Stjúpmæður leika vel valin lög. 

Galdrasmiðir bjóða gestum að gera eigin smíðagripi með gömlu og nýju verklagi. Þar sem járnið er hamrað heitt eða logsuðunni beitt.

Þjóðþekktir listamenn reka vinnustofur á Bygggörðum. Þeir bjóða gestum að líta inn og skyggnast undir yfirborð verkanna. Á trönum verður hvítur strigi þar sem gestir skapa í sameiningu listaverk í anda Jónsmessunnar. 

18:35-19:00 Nesstofa

Átta listakonur bjóða gesti velkomna á samsýninguna Brjóstdropar í Nesstofu, þar sem þær hafa fangað andrúmsloft lækninga og líknar sem einkennir sögu þessa einstaka húss.

Undanfarin 3 ár hefur farið fram uppgröftur á bæjarhól Móakots, sem var hjáleiga frá stórbýlinu Nesi. Gripir og byggingar sem hafa fundist á svæðinu benda til þess að bærinn Móakot eigi sér lengri sögu en áður var talið. Sýndir verða munir, sem fundist hafa við uppgröftinn, og uppgreftri síðustu ára lýst í máli og myndum. Gleðibandið Sunnyside Road leikur á þaki Lækningaminjasafnsins og Hitaveita Seltjarnarness býður upp á þjóðlegar veitingar. Léttur vatnsúðari - ef ekki regnskýin sjálf -  sér til þess að börn og fullorðnir geti baðað sig á daggarvotum grasbalanum vestan við safnið áður en haldið er heim á leið.