Erindisbréf fyrir jafnréttisnefnd Seltjarnarness

Meginhlutverk

Jafnréttisnefnd Seltjarnarnesbæjar starfar, í umboði bæjarstjórnar, að jafnréttismálum í bæjar­félaginu, samkvæmt jafnréttisáætlun bæjarins, lögum og reglugerðum er þar að lúta* og því sem bæjarstjórn felur henni. Þá skal nefndin fylgja samþykkt um stjórn og fundarsköp Seltjarnarnesbæjar eins og hún er hverju sinni.

Meginhlutverk jafnréttisnefndar er að móta stefnu, vinna að og samræma framkvæmd jafnréttismála í anda gildandi jafnréttisstefnu bæjarins hverju sinni. Meðal verkefna nefndarinnar er:

• að vera bæjarstjórn til ráðgjafar og veita umsögn í málefnum sem varða jafnréttismál,
• að gera tillögur til bæjarstjórnar um markmið í jafnréttismálum,
• að móta jafnréttismál í víðtækum skilningi í sveitarfélaginu,
• að fylgjast með og hafa frumkvæði að sérstökum aðgerðum til að tryggja jafna stöðu og jafnan rétt kynjanna,
• að gera tillögur um styrkveitingar til einstakra verkefna, félaga eða einstaklinga og heimildir eru fyrir í fjárhagsáætlun.
• að gera tillögu til bæjarstjórnar um útgáfu fræðsluefnis og hvers kyns aðra kynningu til íbúa Seltjarnarnesbæjar, fyrirtækja og stofnana um þau mál sem falla að verksviði nefndarinnar,
• að fjalla um önnur þau mál sem bæjarstjórn felur nefndinni

Jafnréttisnefnd skal stuðla að framgangi jafnréttismála á Seltjarnarnesi í samræmi við ákvæði laga um jafna stöðu og jafnan rétt karla og kvenna nr. 76/2000. Jafnréttisnefnd endurskoðar jafnréttisáætlun bæjarins í upphafi hvers kjörtímabils og leggur fyrir bæjarstjórn. Nefndin kynnir og framfylgir gildandi jafnréttisáætlun. Jafnréttisnefnd stuðlar að rannsóknum á stöðu kynjanna í bæjarfélaginu. Nefndin skal hvetja til fræðslu um jafnréttismál á öllum skólastigum. Nefndin fylgist eftir föngum með framgangi jafnréttismála hjá vinnuveitendum í bæjarfélaginu. Hún veitir viðurkenningu þeim vinnustað sem best hefur unnið að jafnréttismálum. Hún stuðlar að og hvetur til að jafnréttissjónarmið, í víðtækum skilningi, séu fléttuð inn í alla stefnumótun, ákvarðanir og aðgerðir á vegum bæjarins. Nefndin tekur við ábendingum vegna brota á jafnréttislögum og mótar tillögur til bæjarstjórnar um sérstakar tímabundnar aðgerðir til að jafna stöðu kynjanna eftir því sem ástæða er til hverju sinni. Jafnréttisnefnd er tengiliður við ráðuneyti jafnréttismála, Jafnréttisráð og Jafnréttisstofu.

Nefndin skal leitast við að ná því grundvallarmarkmiði að tryggja að ákvarðanir hennar og vinna skuli fyrst og fremst vera í þágu allra íbúa sveitarfélagsins sem leggur þær skyldur á herðar fulltrúum í nefndinni að setja ávallt almannahagsmuni ofar sérhagsmunum hvort heldur er sínum eigin eða einstakra hópa. Nefndinni er ekki heimil fullnaðarafgreiðsla stefnumarkandi mála eða mála sem hafa í för með sér fjárútlát umfram fjárhagsáætlun.

Fundir og starfshættir

Jafnréttisnefnd skal skipuð þremur mönnum og þrem til vara kosnum af bæjarstjórn að loknum bæjar­stjórnarkosningum. Bæjarstjórn skipar formann jafnréttisnefndar en ritari og varaformaður skulu kosnir af nefndinni á fyrsta fundi hennar. Auk kjörinna fulltrúa sitja starfsmenn félagssviðs fundi nefndarinnar eftir þörfum með málfrelsi og tillögurétt. Þeir eru jafnréttisnefnd til ráðgjafar og aðstoðar við undirbúning og framkvæmd mála. Einnig getur jafnréttisnefnd boðað á fund aðra starfsmenn bæjarins eftir  því sem fundarefni gefur tilefni til hverju sinni.

Formaður jafnréttisnefndar eða varaformaður í forföllum hans boðar eða  lætur boða fundi í nefndinni með a.m.k. sólarhrings fyrirvara og skal dagskrá fylgja fundarboði. Boða ber til fundar, ef þriðjungur eða fleiri aðalmanna æskir þess. Formaður kveður að jafnaði til fundar annan hvern mánuð eða oftar ef þörf er á í samræmi við 3. lið 565. fundar bæjarstjórnar dags. 18.12.2002. Geti nefndarmaður ekki sótt fund boðar starfsmaður varamann í hans stað. Fundargerðir skulu lagðar fyrir bæjarstjórn til kynningar/samþykktar.

Formleg erindi, fyrirspurnir og mál er jafnréttisnefnd berast skulu skráð í málaskrá bæjarins áður en þau eru tekin fyrir á fundum. Á sama hátt skal eftir fund skrá mál er jafnréttisnefnd samþykkir í kjöl­far umræðna að vinna að. Skjalastjóri ber ábyrgð á að skráning og eftirfylgni mála sé í samræmi við reglur Seltjarnarnesbæjar hverju sinni.

Jafnréttisnefnd getur enga ályktun gert nema meirihluti nefndarmanna sitji fund. Við atkvæðagreiðslu ræður einfaldur meirihluti atkvæða úrslitum máls, nema öðruvísi sé ákveðið í lögum. Verði atkvæði jöfn með máli og móti, fellur það. Jafnréttisnefndarmaður, sem vanhæfur er við úrlausn máls , t.d. vegna fjölskyldu- eða hagsmunatengsla, skal yfirgefa fundarsal nefndarinnar við umræðu og afgreiðslu þess, sbr. 3., 4. og 5. greinar Stjórnsýslulaga nr. 37/1993.

Ályktun jafnréttisnefndar, sem hefur í för með sér útgjöld umfram samþykktir bæjarstjórnar, skal ætíð send bæjarstjóra í sérstöku erindi. Bæjarstjóri leggur ályktanirnar fyrir fjárhags- og launanefnd til afgreiðslu.

Þeir sem sitja fundi jafnréttisnefndar skulu gæta fyllsta trúnaðar um þau einkamál, er rædd kunna að vera á fundum. Þagnarskylda helst, þó að látið sé af störfum.

Samþykkt í bæjarstjórn Seltjarnarnesbæjar þann 11.04.2007.