Erindisbréf fyrir skólanefnd Seltjarnarness

Meginhlutverk

Skólanefnd Seltjarnarnesbæjar fer, í umboði bæjarstjórnar, með málefni leikskóla, grunnskóla og tón­listarskóla samkvæmt lögum og reglugerðum er þar að lúta* og því sem bæjarstjórn felur henni. Þá skal nefndin fylgja samþykkt um stjórn og fundarsköp Seltjarnarnesbæjar eins og hún er hverju sinni.

Meginhlutverk skólanefndar er staðfesta áætlun um starfstíma nemenda ár hvert og fylgjast með framkvæmd náms og kennslu í skólahverfinu og sjá um að öll börn í sveitarfélaginu njóti lögboðinnar fræðslu. Skólanefnd fylgist með og stuðlar að því að skólum sé tryggður aðgangur að sérfræðiþjónustu og að jafnan sé fyrir hendi fullnægjandi húsnæði og annar aðbúnaður, þar með talin útivistar- og leiksvæði nemenda. Skólanefnd ásamt skólastjóra lítur eftir að uppfylltar séu kröfur laga og reglugerða á þessu sviði og gerir tillögur til bæjarstjórnar um úrbætur. Meðal verkefna nefndarinnar er:

• að vera bæjarstjórn til ráðgjafar og veita umsögn í skólamálum,
• að fylgjast með framkvæmd laga um tón-, leik- og grunnskóla sem og annarra laga og reglu­gerða er snerta starfssvið nefndarinnar,
• að fara með málefni grunnskóla, leikskóla, dagmæðra og tónlistarskóla eftir því sem lög og reglugerðir ákveða,
• að undirbúa gerð skólamannvirkja og nýtingu þeirra í samvinnu bæjarstjórn,
• að fylgjast með og stuðla að því að skólarnir eigi aðgang að sérfræðiþjónustu,
• að veita bæjarstjórn umsögn um ráðningu skólastjóra og staðfesta ráðningu annarra starfsmanna skóla,
• að gera tillögu til bæjarstjórnar um útgáfu fræðsluefnis og hverskyns aðra kynningu til íbúa Seltjarnarnesbæjar, fyrirtækja og stofnana um þau mál sem falla að verksviði nefndarinnar,
• að veita umsögn um skólanámskrá ár hvert,
• veitir umsögn um gjaldskrár skólanna,
• að hafa samráð við heilbrigðisþjónustu og skólastjóra um skipulagningu og fyrirkomulag heilsugæslu í skólum,
• að fjalla um önnur þau mál sem bæjarstjórn felur nefndinni.

Jafnframt skal skólanefnd stuðla að tengslum og samstarfi tónlistarskóla, leikskóla og grunnskóla. Skólanefnd getur átt frumkvæði að vinnu við mat á skólastarfi, þróunar- og nýbreytnistarfi og símenntun starfsfólks.

Nefndin skal leitast við að ná því grundvallarmarkmiði að tryggja að ákvarðanir hennar og vinna skuli fyrst og fremst vera í þágu allra íbúa sveitarfélagsins sem leggur þær skyldur á herðar fulltrúum í nefndinni að setja ávallt almannahagsmuni ofar sérhagsmunum hvort heldur er sínum eigin eða einstakra hópa. Nefndinni er ekki heimil fullnaðarafgreiðsla mála.

Fundir og starfshættir

Skólanefnd skal skipuð fimm fulltrúum kosnum af bæjarstjórn Seltjarnarness í upphafi hvers kjörtíma­bils. Varamenn í skólanefndum skulu jafnmargir aðalmönnum og kosnir á sama hátt. Bæjarstjórn skipar formann skólanefndar en ritari og varaformaður skulu kosnir af skólanefnd á fyrsta fundi hennar.

Formaður skólanefndar eða varaformaður í forföllum hans boðar eða lætur boða fundi í skólanefnd með a.m.k. sólarhrings fyrirvara og skal dagskrá fylgja fundarboði. Boða ber til fundar, ef þriðjungur eða fleiri aðalmanna í skólanefnd æskir þess. Formaður kveður til fundar svo oft sem þurfa þykir, þó ekki sjaldnar en 8 sinnum á ári.

Formleg erindi, fyrirspurnir og mál er skólanefnd berast skulu skráð í málaskrá bæjarins áður en þau eru tekin fyrir á fundum. Á sama hátt skal eftir fund skrá mál er skólanefnd samþykkir að vinna að. Skjalastjóri ber ábyrgð á að skráning og eftirfylgni mála sé í samræmi við reglur Seltjarnarnesbæjar hverju sinni.

Framkvæmdastjóri fræðslu- og menningarsviðs eða staðgengill hans situr fundi skólanefndar. Leikskólafulltrúi og grunnskólafulltrúi sitja fundi skólanefndar eftir því sem þurfa þykir. Fulltrúar starfsmanna, foreldra og skólastjórar eiga rétt til setu á fundum skólanefndar í samræmi við lög og reglugerðir þar að lútandi. Kjörnum fulltrúum í skólanefnd er heimilt að koma saman til svokallaðra „vinnufunda“ án þess að boða þá aðila sem lögum samkvæmt eiga rétt til setu á formlegum skólanefndarfundum. Hins vegar verður að líta svo á að slíkir fundir séu óformlegir og ekki teknar þar ákvarðanir né haldin opinber gjörðabók, þeir eru m.ö.o. ekki formlegir skólanefndarfundir.

Skólanefnd getur enga ályktun gert nema meirihluti nefndarmanna sitji fund. Við atkvæðagreiðslu ræður einfaldur meirihluti atkvæða úrslitum máls, nema öðruvísi sé ákveðið í lögum. Verði atkvæði jöfn með máli og móti, fellur það. Skólanefndarmaður, sem vanhæfur er við úrlausn máls, skal yfirgefa fundarsal skólanefndar við umræðu og afgreiðslu þess, sbr. 3., 4. og 5. greinar Stjórnsýslulaga nr. 37/1993.

Ályktun skólanefndar, sem hefur í för með sér útgjöld umfram samþykktir bæjarstjórnar, skal ætíð send bæjar­stjóra í sérstöku erindi. Bæjarstjóri leggur ályktanirnar fyrir fjárhags- og launanefnd til endanlegrar afgreiðslu.

Þeir sem sitja fundi skólanefndar skulu gæta fyllsta trúnaðar um þau einkamál, er rædd kunna að vera á fundum. Þagnarskylda helst, þó að látið sé af störfum.

Nemendur og skólasókn

Skólanefnd skal hafa eftirlit með því, að skrá sé til yfir alla skólaskylda nemendur í Seltjarnarnesbæ. Verði verulegur misbrestur á skólasókn skólaskylds barns, ber skólastjóra að gera skólanefnd viðvart. Skólanefnd skal leysa úr vandamálum, sem skólastjóri vísar til nefndarinnar, er varða skólasókn ein­stakra barna á skólaskyldualdri. Skólanefnd getur vísað slíkum málum til menntamálaráðuneytis til úrskurðar, finnist ekki viðunandi úrræði.

Skólastjóri getur vísað nemanda úr skóla um stundarsakir, ef nemanda reynist verulega áfátt í hegðun, enda tilkynni hann forráðamönnum nemanda og skólanefnd tafarlaust þá ákvörðun.  Takist ekki að leysa málið innan skólans, tekur skólanefnd það til meðferðar.  Takist skólanefnd ekki að leysa málið, þannig að allir aðilar þess verði sáttir, getur hvor aðili, forráðamaður eða skólanefnd, vísað málinu til menntamálaráðuneytis, sem leitar úrlausnar og getur úrskurðað með hvaða hætti úr skuli bætt.

Meðferð ágreiningsmála

Komi upp ágreiningur milli skólastjóra leik- grunn- og tónlistarskóla annars vegar og annarra starfs­manna skóla hins vegar, getur hvor aðili um sig vísað málinu til skólanefndar sem leitar lausnar. Úr­skurður skólastjóra skal gilda þar til samkomulag hefur orðið um annað. Takist ekki að finna viðunandi lausn skal vísa málinu til menntamálaráðuneytis. Ágreiningi milli skólastjóra og skólanefndar skal vísa til bæjarstjórnar eða menntamálaráðuneytis eftir eðli málsins. Telji skólastjóri að kennari eða annar starfsmaður skóla hafi gerst brotlegur í starfi skal hann afhenda viðkomandi skriflega áminningu  og jafnframt tilkynna ástæður áminningarinnar til skólanefndar. Ágreiningsmálum er upp kunna að koma milli skólastjóra og annarra en hér eru tilgreindir skal skjóta til skólanefndar til úrlausnar.

Telji foreldrar eða forráðamenn barna að skólastjóri eða kennari hafi gerst brotlegir við leikskóla- eða grunnskólalög geta þeir vísað málinu til  skólanefndar til úrlausnar.