Umhverfisstefna Seltjarnarnesbæjar
1. Lög og reglugerðir
Seltjarnarnesbær mun kappkosta að framfylgja lögum og reglugerðum varðandi umhverfismál sem eiga við starfsemi sveitarfélagsins.
2. Umhverfisfræðsla
Seltjarnarnes leggur áherslu á að miðla og auka þekkingu á mikilvægi umhverfismála í almennum lífsháttum. Mótuð skal heildarstefna í umhverfisfræðslu fyrir skóla, starfsmenn bæjarins og íbúa.
3. Skipulagsmál
Við gerð aðalskipulags verði tekið mið af varðveislu náttúrugæða og menningarverðmæta.
4. Varðveisla lífríkis, náttúrugæða og menningarverðmæta
Seltjarnarnesbær mun kappkosta að varðveita fjölbreytni náttúrunnar með vel undirbúnum aðgerðum og vönduðum vinnubrögðum. Íbúum verði auðveldað að njóta náttúru, sögu og menningarminja.
5. Fráveita og sorphirða
Stefnt skal að því að minnka sorpmagn, auka hlut endurnýtingar og endurvinnslu. Fráveitukerfi bæjarins standist ítrustu kröfur um mengunarvarnir.
6. Grænt bókhald
Seltjarnarnes markar sér vistvæna innkaupastefnu og haldi grænt bókhald um stöðu umhverfismála sem almenningur skal hafa aðgang að.
7. Bæjarbragur og mannlíf
Stefnt skal að því að efla samkennd og bæta mannlíf meðal íbúa Seltjarnarness.
8. Staðardagskrá 21
Seltjarnarnes vinnur í anda Staðardagskrár 21 þar sem íbúar og aðrir áhugasamir hafa möguleika á þátttöku í ákvörðunum varðandi umhverfi sitt. Samþykkt í bæjarstjórn 27. mars 2002
