Íþróttir á Seltjarnarnesi
Á Seltjarnarnesi er öflugt íþróttastarf. Ber þar hæst starf Íþróttafélagsins Gróttu, en hún hefur innan raða sinna knattspyrnudeild, fimleikadeild og handknattsleiksdeild. Meistaraflokkar í handknattleik leika undir merkjum Gróttu.
Sunddeild KR. æfir einnig í Seltjarnarneslaug og tæplega 200 krakkar æfa reglulega með sunddeildinni.
Knattspyrnudeild Gróttu
Grótta sendir að jafnaði sex drengjaflokka ásamt meistaraflokki karla á Íslandsmót, Norðurálsmót, Shellmót eða N1-mót. Jafnframt hefur deildin komið af stað kvennastarfi sem gengið hefur vel í yngri flokkunum. Deildin telur nú um 300 iðkendur.
Æfingar fara fram utandyra allt árið hjá flestum flokkum, en yngstu flokkarnir æfa inni yfir köldustu vetrarmánuðina. Æfingar fara fram á nýjum gervigravelli félagsins sem vígður var árið 2006. Knattspyrnudeildin sér einnig um öflugan knattspyrnuskóla á sumrin fyrir börn 6-10 ára. Börn 11-14 ára er boðið upp á afreksskóla knattspyrnudeildar sem er framhald knattspyrnuskólans.
Formaður knattspyrnudeildar Gróttu er Hilmar Sigurðsson
Yfirþjálfari er Úlfur Blandon
Þjálfari meistarflokks karla er Sigurður Helgason
Heimasíða Gróttu: www.grottasport.is
Handknattleiksdeild Gróttu
Handknattleiksdeild Gróttu er ein stærsta handknattleiksdeild landsins með um 350 iðkendur sem keppa fyrir hönd félagsins á mótum í 2.-8. flokki karla og kvenna auk meistaraflokka karla og kvenna.
Aðalmarkmið deildarinnar er að skila hæfum og góðum einstaklingum til samfélagsins í víðum skilningi. Það er markmið unglingaráðsins að allir iðkendur fái verkefni við sitt hæfi og fái reynslu í keppni og leik.
Einnig er mikilvægt að virkja foreldra í þátttöku í ýmsum verkefnum og um leið taka beinan þátt í starfinu með krökkunum. Ekki er ósennilegt að í kringum íþróttina sé að finna eitt besta forvarnarstarf sem Seltjarnarnesið hefur kynnst. Meistaraflokkar félagsins hafa það að markmiði að vera meðal þeirra bestu hverju sinni.
Formaður handknattleiksdeildar Gróttu er Eiríkur Elís Þorláksson
Þjálfari meistarflokks karla er Guðfinnur Kristmannsson
Þjálfari meistaraflokks kvenna er Ómar Örn Jónsson
Heimasíða Gróttu: www.grottasport.is
Fimleikadeild Gróttu
Fimleikadeild Gróttu býður upp á fimleika sem afreksíþrótt, en einnig er lögð áhersla á að koma á móts við almenna iðkendur sem geti þannig æft fimleika eftir getu og áhuga. Í fimleikadeildinni eru í boði áhaldafimleika fyrir stelpur og stráka frá þriggja ára aldri og hópfimleika fyrir stúlkur.
Að jafnaði eru rúmlega 400 iðkendur í deildinni. Fimleikar eru ein besta alhliða líkamsþjálfun sem býðst, þar sem saman fara samhæfing hreyfinga, liðleiki og snerpa. Mæla má með því að öll börn æfi fimleika sem góðan undirbúning fyrir aðrar íþróttir. Fyrirspurnir má senda á netfangið: fimleikar@grottasport.is
Formaður fimleikadeildar Gróttu er Hildur Sesselja Aðalsteinsdóttir
Yfirþjálfarar deildarinnar eru fjórir talsins; Gabriella Belányi (A, B og C-hópar), Gabor Kiss og Ezster Horvath (D, S og M-hópar) og Harpa Hlíf Bárðadóttir (T-hópar).
Heimasíða Gróttu: www.grottasport.is
Golfklúbbur Ness
Sunddeild KR
Sunddeild KR er eitt af sterkustu sundfélögum landsins þar sem að 200 krakkar í 16 hópum æfa reglulega með félaginu. Auk sundæfinga er mikið félagslíf unnið innan deildarinnar, svo sem æfingabúðir, sundmót, videokvöld og fleira.
Æft er í Sundlaug Seltjarnarness en einnig er æft í Vesturbæjarlaug, Sundhöllinni, Laugardalslaug og í Austurbæjarskóla.
Formaður deildarinnar er Jóhannes Benediktsson.
Yfirþjálfari er Mads Clausen
Heimasíða sunddeildar KR
Trimmklúbbur Seltjarnarness TKS
Trimmklúbbur Seltjarnarness (TKS) er líklega elsti trimmklúbbur landsins. Hann var stofnaður árið 1985 þegar nokkrir áhugasamir trimmarar fóru að hittast reglulega við Sundlaug Seltjarnarness. Árum saman hélt sá merki brautryðjandi almenningsíþrótta, Margrét Jónsdóttir, utan um starf klúbbsins. Kjörorð hennar var "Muna að hafa gaman" og er starfið enn á þeim nótum.
Hópurinn hittist þrisvar í viku árið um kring í anddyri Sundlaugar Seltjarnarness , á mánudögum og miðvikudögum kl. 17.30 og á laugardögum kl. 9:30. Þá er hitað upp með þjálfara og síðan gengið, skokkað, hlaupið eða hjólað mislangt, allt eftir áhuga og getu. Flestir geta fundið sér félaga á sama hraða því hópurinn er breiður. Oftast er hlaupið út með sjó og svo mislangt inn í Reykjavík. Endað er á teygjum og margir fara síðan ávallt í heita pottinn í sundlauginni. Á miðvikudögum er endað á styrktar- og teygjuæfingum í sal og á laugardögum farið í þolæfingar.
Ýmislegt er gert utan fastra tíma. Á hverju sumri er farið í nokkurra daga gönguferðir um óbyggðir landsins, við miklar vinsældir. Einnig er farið í styttri göngur og bryddað upp á ýmsu til tilbreytingar svo sem kakói og rúnnstykkjum eftir skokk, fræðslufundum, árshátíð og fl. Þá stendur TKS stendur fyrir Neshlaupinu í maímánuði ár hvert.
Seltjarnarnesbær leggur til þjálfara, en félagar greiða 2.000 kr. árgjald sem notað er til að halda uppi félagslífinu. TKS er félagsskapur fyrir alla sem hafa áhuga á útivist og hreyfingu. Þar hittist fólk á öllum aldri með misjafna getu. Það er ávallt tekið vel á móti nýliðum og þjálfarinn sinnir byrjendum sérstaklega. Skráning í upphafi er ekki nauðsynleg heldur geta áhugasamir mætt á æfingatímum. Allir velkomnir ! Dagskrá TKS liggur alltaf frammi í sundlauginni.
Heimasíða TKS er http://www.tks.is/
Formaður TKS er Friðbjörn Sigurðsson, netfang fsigurdsson@islandia.is
Balletskóli Guðbjargar
Balletskóli Guðbjargar Björgvinsdóttur hefur starfað á Seltjarnarnesi s.l. 20 ár og hefur ávallt verið til húsa í Íþróttamiðstöðinni við Suðurströnd. Kennt er frá miðjum september til loka apríl.
Starfsemi skólans skiptist í tvennt. Forskóli er fyrir börn 4-6 ára. Klassíski skólinn er fyrir nemendur frá 7 ára aldri. Má segja að í klassíska skólanum hefjist hið eiginlega balletnám. Einnig er boðið upp á ballettíma fyrir eldri nemendur, bæði fyrir byrjendur og lengra komna.
Skólastjóri er Guðbjörg Björgvinsdóttir.
Sími skólans er 561-1459.
Nánari upplýsingar fást í síma 562-0091.
