Urtagarður í Nesi

Til lækninga og heilsubótar

Urtagarður í NesiUrtagarðurinn í Nesi var opnaður árið 2010 í minningu þriggja manna sem tengdu saman ræktun og heilsubót í lífi og starfi. Bjarni Pálsson (1719–1779) fyrsti landlæknir Íslendinga, Björn Jónsson (1738–1798) fyrsti lyfsali landsins og Hans Georg Schierbeck (1847–1911) landlæknir og fyrsti formaður Garðyrkjufélags Íslands.  Bjarni og Björn sátu í Nesi þar sem garðurinn er staðsettur á safnasvæði Seltirninga við Nesstofu.

Urtagarður er safn urta sem ýmist hafa gegnt hlutverki í lækningum eða verið nýttar til næringar og heilsubótar á tímabilinu 1760-1834.  Hluti plantnanna tilheyrir íslenskri flóru og hefur lækningamáttur þeirra lengi verið landsmönnum kunnur. Aðrar eru innfluttar en hafa verið ræktaðar í landinu um lengri eða skemmri tíma.

Gefinn hefur verið út Plöntuvísir. Þar er að finna stutt ágrip af sögu ræktunar í Nesi og þeim forsendum sem Urtagarður byggir á. Einnig er að finna yfirlit yfir allar plöntur garðsins og stutt lýsing á lækningarmætti plantnanna og nytsamir listar yfir plönturnar á latínu og íslensku.

Plöntuvísir eru seldur hjá Lyfjafræðafélagi Íslands í Lyfjafræðasafninu við Neströð á 1000 krónur en allur ágóði af sölunni nýttur til þess að efla rannsóknir og miðlun á sögu ræktunar og nýtingu lækningajurta.

Urtagarðurinn er samvinnuverkefni Seltjarnarnesbæjar, Garðyrkjufélags Íslands, Landlæknisembættisins, Læknafélags Íslands, Lyfjafræðingafélags Íslands, Lyfafræðisafnsins og Lækningaminjasafns Íslands . Garðurinn er rekinn sem hluti af starfsemi safnanna í Nesi.

Skipuð hefur verið sérstök stjórn um Urtagarðinn og er stefnt að því að garðurinn verði vettvangur fræðslu um nýtingu urta til lækninga, næringar og heilsubóta fyrr á tímum og í dag.



Þjónusta


Gott aðgengi fatlaðra, forgangur 1 Gott aðgengi fatlaðra, forgangur 2

Útlit síðu: