Leikskóli Seltjarnarness
Leikskólastjóri: Soffía Guðmundsdóttir
Aðstoðarleikskólastjóri: Anna Harðardóttir
Sími: 5959 280 (Mánabrekka) 5959 290 (Sólbrekka)
Veffang: http://leikskoli.seltjarnarnes.is/
Staðsetning: við Suðurströnd, 170 Seltjarnarnes
Leikskóli Seltjarnarness er sameinuð fag- og rekstrareining undir stjórn eins leikskólastjóra en leikskólinn varð til við sameiningu leikskólanna Mánabrekku og Sólbrekku 1. júlí 2010. Leikskólinn starfar á tveimur starfstöðvum sem standa á sömu lóð við Suðurströnd, Mánabrekka og Sólbrekka. Leikskólinn heyrir undir skólanefnd bæjarins og er fræðslufulltrúi yfirmaður leikskólans. Í leikskólanum eru nemendur á aldrinum tveggja til sex ára og er miðað við að öll börn komist í leikskóla að hausti á því ári sem þau verða tveggja ára. Skólinn er opinn frá kl. 7:45 - 17:15 og boðið er upp á 4 - 9 klst. dvalartíma. Leikskólinn er lokaður í 4 daga á ári vegna skipulags- og námskeiðsdaga. Lokað er á aðfangadag og gamlársdag. Á sumrin er lokað vegna sumarleyfa í 20 daga (4 vikur).
Heimasíða Leikskóla Seltjarnarness: http://leikskoli.seltjarnarnes.is
Lög, reglugerð og Aðalnámskrá leikskóla
Leikskólinn er fyrsta skólastigið í menntakerfinu og ber að skilgreina hann sem slíkan. Leikskólar starfa samkvæmt lögum um leikskóla nr. 90/2008 og reglugerð um starfsumhverfi leikskóla nr. 655/2009 og Aðalnámskrá leikskóla útgefin af menntamálaráðuneytinu 1999. Aðalnámskráin er fagleg stefnumótun um uppeldi og menntun leikskólabarna og setur leikskólum þær skyldur að þeir móti sína eigin skólanámskrá á grundvelli hennar.
Skólanámskrá
Leikskólar Seltjarnarness gáfu út sínar fyrstu skólanámskrár árið 2000. Námskrár leikskólanna gera grein fyrir innra starfi skólanna, starfsháttum, stefnu og skipulagi skólastarfsins. Hver leikskóli hefur þó sína sérstöðu, sjá viðkomandi leikskóla.
Hugmyndafræði leikskóla: Leikurinn er leiðandi hugtak í leikskólastarfinu. Börn á leikskólaaldri læra og þroskast mest og best í leik, leikurinn er því hornsteinn leikskólastarfsins, hann er námsleið barnsins og hann er jafnframt helsta kennsluaðferð leikskólakennarans.
Í Leikskóla Seltjarnarness fer uppeldi og menntun leikskólabarnanna fram í vel skipulögðu umhverfi, með góðum og vönduðum búnaði þar sem hver einstaklingur fær að njóta sín í samvinnu og samstarfi með öðrum börnum.
Samstarf við aðra
Gott samstarf er við Tónlistarskóla Seltjarnarness og kemur tónlistarkennari þaðan einu sinni í viku. Samstarf við Grunnskóla Seltjarnarness hefur aukist ár frá ári og er unnið markvisst að auknum tengslum á milli skólastiga.
Leikskólagjöld ákvarðast af dvalartíma barnins í leikskólanum og hjúskaparstöðu foreldra, sjá gjaldskrá leikskóla.
Umsókn um leikskóla
Sækja þarf um leikskóladvöl í gegnum Rafrænt Seltjarnarnes og er barninu úthlutað leikskóladvöl eftir aldri þess (kennitölu). Þegar barnið byrjar leikskólagöngu sína undirrita foreldrar sérstakan dvalarsamning sem tekur mið af innritunarreglum í leikskóla Seltjarnarness. Leikskólinn er opinn frá kl. 7:45 til 17:15. Boðið er upp á svegjanlegan dvalartíma.
