Skólinn

Valhúsaskóli hóf starfsemi sína árið 1974. Í skólanum eru nú um 250 nemendur og þar starfa um 50 manns.

Einkunnarorð skólans eru virðing, ábyrgð og vellíðan og er lögð áhersla á að þau einkenni skólastarfið. Nemandinn er í brennidepli, líðan hans og þarfir. Stefnt er að því að nemendur njóti og hafi gleði af námi í hvetjandi umhverfi sem virkjar frumkvæði þeirra, hugvit og sköpunargáfu. Vinnuframlag nemenda hefur áhrif á námsmat og áhersla er lögð á að gera nemendur ábyrga fyrir námi sínu. Skólinn nýtir upplýsingatækni í námi og kennslu þar sem það hentar.

Áhersla er lögð á að laða að og halda í metnaðarfullt starfsfólk sem vinnur að því að byggja upp jákvæða sjálfsmynd nemenda þar sem gagnkvæm virðing og góð samskipti eru höfð að leiðarljósi. Skólinn leggur áherslu á heilbrigðan metnað, alhliða þroska og menntun hvers og eins, jákvæðan aga og virka þátttöku alls skólasamfélagsins.

Í skólanum er unnið í anda Uppbyggingar (Restitution), sem einnig gengur undir nafninu Uppeldi til ábyrgðar. Um er að ræða mannúðarstefnu sem leggur áherslu á að kenna sjálfstjórn og ýtir undir hæfni til að bera ábyrgð á eigin orðum og gerðum. Mikilvægur þáttur í uppbyggingu er að öllum sé ljóst hvert sé hlutverk þeirra og lífsgildi. Virðing er leiðarljós í samskiptum. Reglur skólans taka mið af Uppeldi til ábygðar svo og lögum um grunnskóla og starfar skólinn samkvæmt skólastefnu Seltjarnarnesbæjar.

Uppeldi til ábyrgðar

Í Valhúsaskóla vinnum við eftir hugmyndafræðinni Uppeldi til ábyrgðar - uppbygging sjálfsaga (e. restitution) sem leggur áherslu á að ýta undir ábyrgðarkennd og sjálfstjórn unglinga. Einnig þjálfar það þá í að ræða tilfinningar sínar og hjálpar þeim að átta sig á þörfum sínum. Stefnan styrkir einstaklinga í að læra af mistökum sínum og eru kennsluhættir, stjórnunarhættir og meðferð agamála lituð af stefnunni. Hugmyndafræðin byggist á því að einstaklingar geti tekið sjálfstæðar og siðferðislegar ákvarðanir varðandi eigin hegðun þegar hann er laus undan skömm, hótunum, sektarkennd eða væntingum og loforðum um umbun og að hann hafi tækifæri til að meta lífsgildi sín.

Nemendur vinna verkefni þar sem þeir eru spurðir hver hlutverk þeirra eru og hvaða þarfir liggja á bak við hegðun þeirra. Í hverjum bekk er síðan unnið að sáttmála þar sem kennari og nemendur ákveða í sameiningu hvaða lífsgildi þeir vilja hafa að leiðarljósi innan bekkjarins.

Í Uppeldi til ábyrgðar er lögð áhersla á jákvæð samskipti fremur en reglur, ábyrgð fremur en blinda hlýðni og sjálfsvirðingu fremur en umbun.

Undirstöðuþáttur í uppbyggingunni eru grunnþarfirnar fimm. Til að geta breytt hegðun til hins betra þarf hver og einn að þekkja og skilja sínar þarfir og vita hvað liggur á bak við þá hegðun sem við sýnum. Öll hegðun stafar nefnilega af því að við erum alltaf að reyna að mæta einhverri af þessum þörfum. Við höfum öll missterkar þarfir sem gerir það að verkum að við erum öll ólík.

Heilsustefna skólans

Við erum heilsueflandi grunnskóli sem leggur áherslu á að efla líkamlega, andlega og félagslega heilsu nemenda og starfsfólks. Markmið skólans er að skapa jákvætt, öruggt og hvetjandi umhverfi sem styður við vellíðan og nám allra.

Markmið:

Að tryggja öllum nemendum og starfsfólki tækifæri til hreyfingar og hollra lífsvenja.
Að efla andlega heilsu, félagsfærni og jákvæð samskipti.
Að skapa umhverfi sem stuðlar að vellíðan og heilsueflingu í víðu samhengi.
Að tryggja að heilsuefling sé samþætt skólastarfinu í heild sinni.

Síðast uppfært 16. mars 2026

Loka