Samþykkt um meðhöndlun úrgangs á Seltjarnarnesi

1. grein
Markmið og gildissvið

Markmið samþykktar þessarar er að:

• Stuðla að því að meðhöndlun úrgangs í sveitarfélaginu valdi sem minnstum óæskilegum áhrifum á umhverfið.
• Stuðla að því að sveitarfélagið nái settum markmiðum fyrir endurvinnslu og urðun úrgangs frá heimilum og rekstraraðilum.
• Stuðla að vinnuvernd starfsfólks og veita góða þjónustu við íbúa.
• Horft verði til forgangsröðunar við meðhöndlun úrgangs, áhersla lögð á úrgangsforvarnir og mengunarbótareglan – sá geldur sem veldur – höfð að leiðarljósi við ákvörðun gjaldtöku vegna meðhöndlunar úrgangs.
• Samþykkt þessi gildir fyrir úrgang sem fellur undir lög nr. 55/2003 um meðhöndlun úrgangs. Samþykktin gildir fyrir meðhöndlun úrgangs, bæði íbúa og rekstraraðila í Sveitarfélaginu Seltjarnarnesi.

2. grein
Umsjón og eftirlit

Skipulags- og umhverfissvið Seltjarnarnesbæjar hefur umsjón með málefnum er varða meðhöndlun úrgangs í sveitarfélaginu í umboði sveitarstjórnar. Sviðið fer með daglega yfirstjórn meðhöndlunar úrgangs samkvæmt samþykkt þessari.
Heilbrigðisnefnd Garðabæjar, Hafnarfjarðar, Kópavogs, Mosfellsbæjar og Seltjarnarness hefur eftirlit með meðhöndlun úrgangs, sbr. 2. mgr. 4. gr. laga um meðhöndlun úrgangs, nr. 55/2003, og 9. gr. reglugerðar um meðhöndlun úrgangs, nr. 803/2023, og að farið sé að samþykkt þessari skv. 47. gr. laga um hollustuhætti og mengunarvarnir, nr. 7/1998.

3. grein
Söfnun og flokkun úrgangs við heimili

Seltjarnarnesbær sér um söfnun á heimilisúrgangi frá íbúðarhúsum í sveitarfélaginu. Sveitarfélagið getur sinnt söfnun úrgangs á eigin vegum eða falið öðrum framkvæmdina.

Sérhverjum húsráðanda íbúðarhúss er skylt að flokka úrgang við húsnæðið og að nota ílát, merkingar og aðferðir sem sveitarfélagið ákveður, sbr. 4. gr. samþykktarinnar. Íbúar skulu flokka heimilisúrgang í að lágmarki sjö flokka:

• Lífúrgang.
• Pappír/pappa.
• Plast.
• Textíl.
• Málma.
• Gler.
• Spilliefni.

Sveitarfélagið útvegar ílát fyrir lífúrgang (matarleifar, afskorin blóm, pottaplöntur og eldhúspappír), pappír/pappa, plast og blandaðan úrgang við heimili. Matar- og eldhúsúrgang skal setja í pappírspoka. Ekki er heimilt að nota annað en pappírspoka. Þar sem heimajarðgerð er til staðar er skylt að vera með ílát fyrir lífúrgang sem nýtist ekki í heimajarðgerð. Tekið er á móti rúmfrekum garðaúrgangi á endurvinnslustöðvum, en óheimilt er að setja hann í ílát fyrir lífúrgang við heimili.

Tekið er á móti a.m.k. gleri, málmum og textíl á grenndar- og endurvinnslustöðvum.

Óheimilt er að setja eftirfarandi úrgangsflokka í ílát fyrir blandaðan úrgang en tekið er á móti þessum úrgangsflokkum frá íbúum á endurvinnslustöðvum:

• Spilliefni eða annan hættulegan úrgang.
• Timbur, brotamálm, múrbrot og annan grófan úrgang.
• Garðaúrgang, jarðefni og grjót.
• Lyfjum og lyfjaumbúðum sem komist hafa í snertingu við lyf skal skila í lyfjabúðir.

Seltjarnarnesbær birtir áætlun um hirðutíðni á vefsíðu sinni. Miðað er við að ílát fyrir lífúrgang séu losuð ekki sjaldnar en á 14 daga fresti. Ílát fyrir blandaðan úrgang eru að öllu jöfnu losuð samhliða lífúrgangi. Heimilt er að losa ílát fyrir pappír/pappa og plast sjaldnar og ákveður sveitarfélagið hirðutíðni.

Ganga skal þannig frá úrgangi að ekki stafi af honum hætta fyrir starfsfólk sem sinnir hirðu eða annarri meðhöndlun úrgangs.

4. grein
Ílát fyrir úrgang við heimili

Að lágmarki skulu vera ílát fyrir fjóra flokka úrgangs við hvert íbúðarhús, þ.e. blandaðan úrgang, lífúrgang, pappír/pappa og plast. Seltjarnarnesbær útvegar ílát til notkunar við hvert íbúðarhús, önnur en djúpgáma og gáma á yfirborði, sjá 10. gr. samþykktarinnar. Seltjarnarnesbær er heimilt að setja sér reglur um eignarhald á ílátum. Íbúar bera ábyrgð á að þau séu í góðu ásigkomulagi, hrein og hægt sé að þjónusta þau.

Sveitarfélagið merkir ílátin með samræmdum flokkunarmerkjum. Ílát sem sveitarfélagið útvegar eru eign Seltjarnarnesbæjar og sér það um viðhald á þeim. Sveitarfélagið áskilur sér rétt til að breyta og/eða bæta við tegundum íláta í þjónustu.

Ílát fyrir úrgang skulu vera tvískipt 240 l (144 l/96 l) og 140 l, 240 l, 360 l eða 660 l með einu hólfi. Heimilt er að óska eftir að heimilisúrgangur sé hirtur í djúpgámum eða gámum á yfirborði, sbr. 10. gr. samþykktarinnar.

Ílátin skulu rúma þann úrgang sem fellur til frá húsnæðinu milli hirðuumferða og þyngd þeirra ekki vera meiri en svo að hægt sé að færa þau til losunar. Þannig skal taka tillit til þyngdar viðkomandi úrgangsflokks við val á stærð og staðsetningu íláta. Sveitarfélagið getur ákveðið fjölda og stærð íláta telji það að rými fyrir úrgang sem fellur til sé ófullnægjandi eða stærð íláts henta illa til hirðu. Um stærð og fjölda djúpgáma og gáma á yfirborði fer skv. 10. gr. samþykktarinnar. Gæta skal þess að fylla ekki ílátin meira en svo að auðveldlega megi loka þeim, flytja og tæma. Tilfallandi umframúrgang sem ekki rúmast í íláti skal losa á grenndar- eða endurvinnslustöðvar, þar sem tekið er við viðkomandi úrgangsflokki.

Að uppfylltum framangreindum skilyrðum er húseigendum heimilt að óska eftir samþykki Seltjarnarnesbæjar á breytingum á stærð og fjölda íláta. Í fjöleignarhúsum þar sem sorpgeymslur og sorpílát eru samnýtt skulu ákvarðanir um fjölda og stærð íláta teknar í samræmi við ákvæði laga um fjöleignarhús, nr. 26/1994.

Íbúðareigendur skulu gæta þess að valda ekki skemmdum á ílátunum. Verði ílát fyrir skemmdum af öðrum ástæðum en eðlilegri notkun og sliti getur sveitarfélagið farið fram á að fasteignareigandi greiði fyrir nýtt ílát. Íbúðareigendur skulu halda ílátum hreinum svo ekki skapist heilsuspillandi aðstæður eða óþægindi af völdum þeirra. Haldi íbúðareigendur ílátum ekki hreinum getur heilbrigðisnefnd gefið fyrirmæli um þrif.

Ílát verður ekki hirt ef aðstæður hindra hirðuaðila í að sinna þjónustunni. Er þá sett tilkynning með límmiða á sorpílát eða -geymslu/-gerði um ástæðu þess að ekki var hirt og hvernig íbúar skuli bregðast við. Ástæður geta m.a. verið:

• Ílát inniheldur úrgang sem ekki á að safna eða flokkun úrgangs er röng.
• Ílát er yfirfullt eða stíflað þar sem úrgangi er þjappað í það.
• Ílát finnst ekki eða það vantar lykla að geymslum.
• Ílát eða aðstaða brýtur í bága við lög um aðbúnað, hollustuhætti og öryggi á vinnustöðum nr. 46/1980, reglur og reglugerðir settar skv. þeim eða ákvæði samþykktar þessarar.

Ekki er hægt að færa ílát að hirðubíl til losunar þar sem leiðin að íláti er lokuð eða ógreiðfær. Ef ílát er ekki hirt er íbúum tilkynnt um ástæður þess og hvernig íbúar skuli bregðast við með miða sem er límdur á viðkomandi ílát.

5. grein
Grenndarstöðvar

Seltjarnarnesbær, í samstarfi við önnur sveitarfélög eða með sameiginlegum þjónustusamningum, annast rekstur grenndarstöðva þar með talið hreinsun og þrif, fyrir flokkaðan heimilisúrgang frá íbúum.

Á grenndarstöðvum skal tekið á móti flokkuðum úrgangi frá íbúum til endurnýtingar. Stöðvarnar skulu staðsettar þar sem aðgengi er gott hvort sem er fyrir gangandi, hjólandi eða akandi. Grenndarstöðvar skulu vera í nærumhverfi íbúa og þéttleiki grenndarstöðva skal vera þannig að gætt sé jafnræðis m.t.t. aðgengis íbúa.

Á grenndarstöðvum skal tekið a.m.k. á móti eftirfarandi úrgangi:

• Minni grenndarstöðvar: Gleri, málmum og textíl.
• Stærri grenndarstöðvar: Pappír/pappa, plasti, gleri, málmum og textíl.

Ílát skulu merkt með samræmdum flokkunarmerkjum. Óheimilt er að losa annan úrgang á grenndarstöð en þá flokka úrgangs sem tilgreindir eru með merkingum á hverri stöð. Óheimilt er að skilja úrgang eftir utan við gáma á grenndarstöðvum.

6. grein
Endurvinnslustöðvar

Seltjarnarnesbær, í samstarfi við önnur sveitarfélög eða með sameiginlegum þjónustusamningum, annast rekstur endurvinnslustöðva. Þéttleika, opnunartíma, gjaldtöku og aðrar rekstrarforsendur endurvinnslustöðva skal skilgreina í þjónustusamningi.

Ílát skulu merkt með samræmdum flokkunarmerkjum. Á endurvinnslustöðvum skal tekið á móti flokkuðum úrgangi frá íbúum og rekstraraðilum, m.a.:

• Flokkuðum byggingar- og niðurrifsúrgangi.
• Rúmfrekum úrgangi.
• Garðaúrgangi.
• Spilliefnum.

7. grein
Móttökustöðvar

Seltjarnarnesbær, í samstarfi við önnur sveitarfélög eða með sameiginlegum þjónustusamningum, annast rekstur móttökustöðvar fyrir úrgang sem fellur til í sveitarfélaginu og skal tryggja farveg fyrir allan úrgang sem fellur til í sveitarfélaginu. Þar er aðstaða til að taka við úrgangi til geymslu til lengri eða skemmri tíma, til umhleðslu, flokkunar eða annarrar meðhöndlunar. Þaðan fer úrgangurinn til förgunar eða nýtingar.

Seltjarnarnesbær, í samstarfi við önnur sveitarfélög eða með sameiginlegum þjónustusamningum, hefur umsjón með allri ráðstöfun úrgangs, sérsöfnuðum og blönduðum, sem safnað er frá íbúðarhúsum í sveitarfélaginu. Seltjarnarnesbær, í samstarfi við önnur sveitarfélög eða með sameiginlegum þjónustusamningum, ýmist meðhöndlar úrgang, flytur hann til ráðstöfunaraðila eða býður út móttöku á sérsöfnuðum endurvinnsluefnum, sem og fylgir eftir úrgangsstraumum og útvegar staðfestingu á ráðstöfun efnis til endurvinnslu, annarrar endurnýtingar eða förgunar.

8. grein
Söfnun, flokkun og ráðstöfun úrgangs hjá rekstraraðilum

Rekstraraðilar skulu flokka heimilisúrgang í að lágmarki eftirfarandi flokka:

• Lífúrgang.
• Pappír/pappa.
• Plast.
• Gler.
• Málma.
• Textíl.
• Spilliefni.

Rekstrarúrgang skulu rekstraraðilar flokka þannig að hámarka megi undirbúning fyrir endurnotkun, endurvinnslu og aðra endurnýtingu í þessari forgangsröð.

Rekstraraðilum er skylt að flokka byggingar- og niðurrifsúrgang í a.m.k.:

• Spilliefni.
• Timbur.
• Steinefni.
• Gler.
• Málma.
• Plast.
• Gifs.

Sérstök söfnun skal vera á lóð rekstraraðila fyrir þá flokka heimilisúrgangs sem til falla við starfsemina og tilgreindir eru í 1. mgr. Rekstraraðilar skulu semja við þjónustuaðila, sem er með eftir atvikum staðfesta skráningu skv. reglugerð nr. 830/2022 um skráningarskyldan atvinnurekstur samkvæmt lögum um hollustuhætti og mengunarvarnir, nr. 7/1998, eða starfsleyfi um söfnun og flutning heimilisúrgangs, og skulu leggja fram staðfestingu þess efnis óski sveitarfélagið eða heilbrigðisnefnd þess. Tryggt skal að fjöldi íláta sé í samræmi við flokkun sem nauðsynleg er og að ílátin rúmi þann úrgang sem fellur til við viðkomandi rekstur milli tæminga eða hirðuumferða. Telji Seltjarnarnesbær meðhöndlun heimilisúrgangs hjá rekstraraðila ekki samræmast lögum, reglugerðum eða samþykkt þessari er sveitarfélaginu heimilt að ákveða fjölda íláta og flokkun. Fari rekstraraðili ekki að fyrirmælum eða ákvæðum samþykktar þessarar er heilbrigðisnefnd heimilt að beita þvingunarúrræðum skv. 66. gr. laga um meðhöndlun úrgangs, nr. 55/2003, m.a. að láta vinna verk á kostnað viðkomandi rekstraraðila.

Þjónustuaðilar sem sinna söfnun úrgangs í sveitarfélaginu skulu skila Umhverfisstofnun skýrslu um tegund, magn, uppruna og ráðstöfun úrgangs, sbr. 1. mgr. 19. gr. laga um meðhöndlun úrgangs, nr. 55/2003.

Rekstraraðilar skulu koma í veg fyrir að rekstrarúrgangur safnist fyrir á lóð. Aðstaða rekstraraðila til flokkunar og meðhöndlunar úrgangs, þ.m.t. geymslur og gerði, skal vera nægilega rúmgóð til að rúma flokkunarílát og úrgang sem fellur til við starfsemina milli tæminga eða hirðuumferða. Óheimilt er að geyma rekstrarúrgang utan lóðar rekstraraðila. Óheimilt er að geyma úrgang þannig að valdið geti ónæði, skaða eða lýti á umhverfi.

Rekstraraðilar á Seltjarnarnesi skulu skila öllum úrgangi til þjónustuaðila með staðfesta skráningu skv. reglugerð nr. 830/2022 eða á móttökustöð fyrir úrgang sem er með gilt starfsleyfi. Rekstraraðilum er heimilt að nýta endurvinnslustöðvar til skila á rekstrarúrgangi en skulu greiða fyrir gjaldskylda móttöku úrgangs skv. gjaldskrá. Rekstraraðilum er óheimilt að nýta grenndarstöðvar eða ruslabiður sem Seltjarnarnesbær rekur til afsetningar á úrgangi.

Mengaðan jarðveg skal færa til viðeigandi meðhöndlunar, sbr. reglugerð nr. 1400/2020 um mengaðan jarðveg.

Um smitandi úrgang fer skv. 12. og 13. gr. reglugerðar nr. 803/2023 um meðhöndlun úrgangs og I. viðauka við hana.

9. grein
Geymslur og gerði fyrir söfnun úrgangs

Íbúar skulu ganga þannig frá ílátum, geymslum og gerðum að þau valdi ekki óþrifum eða óþægindum. Halda skal geymslum og gerðum við eftir þörfum og þau hreinsuð reglulega. Þau má eingöngu nota til geymslu úrgangs.

Við hönnun á nýjum geymslum og gerðum og breytingar á eldri geymslum og gerðum skal rými fyrir ílát miðast við viðeigandi flokkun og áætlað úrgangsmagn sem til fellur í húsnæðinu og að aðgengi sé gott til losunar íláta. Hönnun sorpgeymslna og -gerða skal vera í samræmi við grein 6.12.8 í byggingarreglugerð. Lyklar af læstum geymslum og -gerðum skulu vera í samræmi við fyrirmæli umhverfis- og tæknisviðs bæjarins, þannig að einn lykill gangi að öllum læstum sorpgeymslum og -gerðum í bænum.

Sorpílát skulu vera á jarðhæð og standa sem næ st aðkomu að lóð þegar losun fer fram eða ekki lengra en 15 m frá lóðarmörkum þar sem því verður komið við. Af ílátum undir úrgang við íbúðarhús sem draga þarf lengra en 15 m að hirðubíl til losunar er heimilt að innheimta viðbótarlosunargjald samkvæmt gjaldskrá fyrir meðhöndlun úrgangs í sveitarfélaginu. Þar sem fleiri en eitt ílát eru við hús skulu ílát sem ætluð eru sama úrgangsflokki geymd á einum stað en ekki dreift um lóð.

Óheimilt er að staðsetja ílát undir úrgang sem eru þyngri en 40 kg með úrgangi þannig að fara þurfi með þau um tröppur eða mikinn hæðarmun á lóð. Þar sem fara þarf með ílát um tröppur skulu vera á tröppum rampar sem draga má ílátin eftir. Gangbraut milli rampa skal vera u.þ.b. 35 cm breið og breidd hvors ramps minnst 20 cm.

Halda skal greiðfærri leið að ílátum fyrir úrgang og hreinsa burt snjó á vetrum. Þegar hundur er tjóðraður á lóð eða laus á lóð innan hundheldrar girðingar skal tryggja að komast megi óhindrað að ílátum til losunar. Aðkomuleiðir að ílátum undir úrgang skulu, eftir því sem kostur er, vera upplýstar og upphitaðar svo ekki skapist hætta fyrir starfsfólk við losun ílátanna. Sveitarfélaginu er heimilt að hafna losun íláta telji það aðstæður skapa hættu fyrir starfsfólk sorphirðu og aðgengi eða frágang sorpgeymslu/-gerðis ófullnægjandi.

Séu sorpgeymslur eða -gerði læst skal notast við lyklakerfi sveitarfélagsins. Þar sem fara þarf um lokuð hlið eða dyr getur sveitarfélagið farið fram á að til staðar sé búnaður, t.d. krækjur, til að halda dyrum og hliðum opnum á meðan losun fer fram.

Að öðru leyti er vísað til byggingarreglugerðar nr. 112/2012 og reglugerðar um meðhöndlun úrgangs, nr. 803/2023.

10. grein
Gámar - djúpgámar og gámar á yfirborði

Með gámum er átt við bæði djúpgáma og gáma á yfirborði. Með djúpgámum er átt við niðurgrafna gáma sem losaðir eru með krana. Með gámum á yfirborði er átt við ílát sem eru stærri en svo að ekki er hægt að færa þau að söfnunarbíl með handafli. Hífa eða lyfta þarf gámum upp með vélarafli til að tæma þá í söfnunarbíl.

Gámar skulu uppfylla ákvæði staðalsins IST EN 13071 og skal hönnun þeirra vera í samráði við sveitarfélagið . Afla skal samþykkis sveitarfélagsins við val á gámum, fjölda þeirra, stærð og staðsetningu.

Kaup á gámum, framkvæmdir við gerð og frágang í kringum þá, hvort sem er kassi, gámur, lúga eða annar tengdur búnaður, greiðist af og er á ábyrgð fasteignareiganda. Gámar skulu rúma það magn úrgangs sem til fellur frá fasteigninni, miðað við hirðutíðni. Við ákvörðun um fjölda gáma skal minnst gera ráð fyrir fjórum úrgangsflokkum sem safna skal við heimili. Taka skal tillit til þyngdar viðkomandi úrgangsflokks við val á stærð og staðsetningu gáma.

Gámar skulu vera staðsettir á lóð en ekki bæjarlandi. Seltjarnarnesbær getur heimilað fasteignareigendum aðliggjandi lóða að vera með sameiginlega gáma sem staðsettir eru á lóð eða lóðum sem tilheyra fasteignunum. Sameiginlegir gámar eru háðir samþykki byggingarfulltrúa. Sé söfnun úrgangs sameiginleg fyrir aðliggjandi lóðir og færð af lóð mannvirkis skal öll söfnun úrgangs færast af viðkomandi lóðum.

Staðsetning gámanna skal vera þannig að losun þeirra hindri ekki aðra umferð og öryggi vegfarenda sé tryggt. Fasteignareigandi ber ábyrgð á rekstri gáma, og lóðarhafi ber ábyrgð á hreinsun og umgengni um lóðina og nánasta umhverfi hennar eins og um annars konar sorpgeymslur sé að ræða. Heilbrigðisnefnd hefur eftirlit með almennum þrifnaði og hreinlæti utanhúss og hlutast til um að fram fari eftir þörfum almenn hreinsun lóða og lendna í þrifnaðarskyni, sbr. 14. gr. reglugerðar nr. 803/2023 um meðhöndlun úrgangs.

Staðsetning og frágangur gáma skulu vera í samræmi við gildandi skipulagsáætlanir fyrir viðkomandi svæði og hönnunarviðmið Seltjarnarnesbæjar um úrgangslausnir. Miða skal við ákvæði byggingarreglugerðar við ákvörðun fjarlægðar gáma frá inngangi fasteignar.

Að öðru leyti gildir 4. gr. samþykktar þessarar eftir því sem við á.

11. grein
Heimild til aukinnar söfnunar

Þrátt fyrir ákvæði 1. mgr. 3. gr. er Seltjarnarnesbæ heimilt að veita öðrum aðilum leyfi til aukinnar söfnunar á flokkuðum heimilisúrgangi frá íbúðarhúsum í sveitarfélaginu. Skilyrði er að þjónusta sem veitt er sé meiri en þjónusta sem sveitarfélagið veitir, þ.e. nái til söfnunar á öðrum úrgangsflokkum. Í leyfi skal kveðið á um nánari skilyrði, m.a. uppsagnarákvæði þjónustunnar gagnvart þjónustuþegum. Leyfishafi skal vera með eftir atvikum staðfesta skráningu skv. reglugerð nr. 830/2022 eða starfsleyfi. Úrganginum skal skilað til móttökustöðvar með gilt starfsleyfi skv. lögum um hollustuhætti og mengunarvarnir, nr. 7/1998.

Leyfishafi skal gefa sveitarfélaginu skýrslu um magn úrgangs og flokkun hans, fjölda heimila, fjölda íláta, tíðni losunar og meðhöndlun úrgangsins og aðrar þær upplýsingar sem óskað er eftir. Leyfishafi skal veita gögn til staðfestingar á meðhöndlun úrgangsins, sé þess óskað. Leyfishafi skal veita upplýsingar að eigin frumkvæði fyrir 1. mars ár hvert. Sinni leyfishafi ekki þeim skyldum sem á hann eru lagðar er sveitarfélaginu heimilt að fella leyfið úr gildi að undangenginni viðvörun.

Seltjarnarnesbæ er heimilt að veita félögum sem eru ekki rekin í hagnaðarskyni leyfi til söfnunar á flokkuðum heimilisúrgangi í sveitarfélaginu. Skilyrði er að úrgangurinn nýtist til undirbúnings fyrir endurnotkun að hluta eða öllu leyti. Í leyfi skal kveðið á um nánari skilyrði, m.a. uppsagnarákvæði. Leyfishafi skal vera með eftir atvikum staðfesta skráningu skv. reglugerð nr. 830/2022 eða starfsleyfi. Leyfishafi skal gefa sveitarfélaginu skýrslu um magn úrgangs og flokkun hans, fjölda og staðsetningu íláta, meðhöndlun úrgangsins og aðrar þær upplýsingar sem óskað er eftir. Sinni leyfishafi ekki þeim skyldum sem á hann eru lagðar er sveitarfélaginu heimilt að fella leyfið úr gildi að undangenginni viðvörun.

12. grein
Úrgangur á almannafæri

Óheimilt er að skilja úrgang eftir á víðavangi, götum eða gangstéttum eða opnum svæðum. Sama á við um númerslausa bíla, bílflök og sambærilega hluti. Heilbrigðisnefnd er heimilt að fjarlægja tæki, hluti eða ökutæki og bera eigendur þeirra allan kostnað af þeirri framkvæmd, sbr. ákvæði 14. gr. reglugerðar um meðhöndlun úrgangs nr. 803/2023.

13. grein
Fræðsla og kynningar

Seltjarnarnesbær hefur sjálfur, eða í samstarfi við önnur sveitarfélög eða með sameiginlegum þjónustusamningum, umsjón með fræðslu og kynningu um úrgangsmeðhöndlun og úrgangsforvarnir. Setja skal fram upplýsingar um söfnun og aðra úrgangsstjórnun í sveitarfélaginu svo að almenningur, rekstraraðilar og aðrir handhafar úrgangs þekki skyldur sínar, t.d. um losunartíðni íláta við heimili og staðsetningar grenndar-, endurvinnslu- og móttökustöðva.

14. grein
Úrgangsforvarnir

Úrgangsstjórnun á Seltjarnarnesi og flokkun úrgangs skal hvetja til úrgangsforvarna. Gjöld skulu miða við magn úrgangs, rúmmál eða þyngd, svo úrgangshafar borgi í samræmi við það sem hent er. Rekstraraðilar skulu vinna að úrgangsforvörnum.

Í fræðslu- og kynningarefni á vegum sveitarfélagsins skal lögð áhersla á úrgangsforvarnir. Seltjarnarnesbær skal í samstarfi við önnur sveitarfélög, eða með sameiginlegum þjónustusamningi, vinna að því að skapa markað fyrir endurnotkun.

15. grein
Gjaldtaka

Innheimta skal gjald fyrir meðhöndlun úrgangs í samræmi við ákvæði 23. gr. laga um meðhöndlun úrgangs, nr. 55/2003.

Gjaldið skal ákvarðað og innheimt samkvæmt gjaldskrá sem sett er samkvæmt ákvæðum 23. gr. laga um meðhöndlun úrgangs, nr. 55/2003, sbr. einnig 59. gr. laga um hollustuhætti og mengunarvarnir, nr. 7/1998. Sveitarfélagið skal láta birta gjaldskrána í B-deild Stjórnartíðinda. Gjald fyrir söfnun á heimilisúrgangi og rekstur grenndar- og endurvinnslustöðva innheimtist með fasteignagjöldum á sömu gjalddögum.

Gjald fyrir meðhöndlun heimilisúrgangs skal miðast við fjölda og stærð íláta og tegund úrgangs. Einnig er heimilt að miða gjaldið við vegalengd sem draga þarf ílát við losun. Sé þessu breytt breytist gjaldið miðað við hluta úr ári reiknað í vikum. Sveitarfélagið annast skráningu íláta og skiptingu gjalds á eigendur.

Gjald fyrir rekstur grenndar- og endurvinnslustöðva er lagt á allar fasteignir í sveitarfélaginu.

Seltjarnarnesbær, í samstarfi við önnur sveitarfélög eða með þjónustusamningum, gefur út gjaldskrá fyrir móttöku úrgangs á endurvinnslu- og móttökustöðvum.

Til tryggingar greiðslu samkvæmt gjaldskrá, sbr. 2. mgr., er lögveðsréttur í viðkomandi fasteign í tvö ár eftir gjalddaga, sbr. 5. mgr. 59. gr. laga um hollustuhætti og mengunarvarnir, nr. 7/1998.

Hirðugjald er ekki endurgreitt falli hirða niður af ástæðum sem tilgreindar eru í 9. mgr. 4. gr. samþykktarinnar. Þá verður hirðugjald ekki endurgreitt verði tafir á hirðu vegna t.d. ófærðar eða bilana.

16. grein
Kvartanir, ábendingar og kærur

Hafi íbúi eða rekstraraðili fram að færa kvörtun eða ábendingu vegna meðhöndlunar úrgangs skal hann koma henni á framfæri við sveitarfélagið eða aðila með þjónustusamning, eftir því sem við á.

Heimilt er að kæra stjórnvaldsákvarðanir sem teknar eru á grundvelli samþykktar þessarar til úrskurðarnefndar umhverfis- og auðlindamála, sbr. 67. gr. laga um meðhöndlun úrgangs, nr. 55/2003, og 65. gr. laga um hollustuhætti og mengunarvarnir, nr. 7/1998.

17. grein
Viðurlög

Með brot á samþykkt þessari skal farið samkvæmt ákvæðum laga um hollustuhætti og mengunarvarnir, nr. 7/1998, sbr. einnig XIII. kafla laga um meðhöndlun úrgangs, nr. 55/2003.

Um sektir og önnur viðurlög vegna óheimillar losunar úrgangs fer skv. XIX. kafla laga um hollustuhætti og mengunarvarnir, nr. 7/1998, XIII. kafla laga um meðhöndlun úrgangs, nr. 55/2003, og lögreglusamþykkt fyrir Seltjarnarneskaupstað.

18. grein
Gildistaka

Samþykkt þessi var sett af bæjarstjórn Seltjarnarnesbæjar, 13. maí 2026 og staðfestist hér með samkvæmt 2. mgr. 8. gr. laga um meðhöndlun úrgangs, nr. 55/2003, sbr. 59. gr. laga um hollustuhætti og mengunarvarnir, nr. 7/1998, og staðfestist hér með til að öðlast þegar gildi. Frá sama tíma fellur úr gildi samþykkt nr. 95/1999, um sorphirðu og hreinsun opinna svæða á Seltjarnarnesi.

 

Reglur þessar voru samþykktar í bæjarráði Seltjarnarnesbæjar þann 7. maí 2026 og staðfestar í bæjarstjórn Seltjarnarnesbæjar þann 13. maí 2026.

Bæjarstjórinn á Seltjarnarnesi