Fræðasetur var opnað í Gróttu aldamótaárið 2000 og er innan þess glæsileg funda- og námsaðstaða í óvenjulegu umhverfi.
Salur hússins rúmar um 30 manns í sæti og á loftinu er gistiaðstaða fyrir sama fjölda. Þá er ágætlega búið eldhús á staðnum. Í kjallara setursins er vinnuaðstaða fyrir nemendur til að vinna úr verkefnum sem tengjast veru þeirra í Gróttu. Athugið að ferðir í Fræðasetur Gróttu eru háðar bæði flóði og fjöru og varptíma.
Seltjarnarnesbær heldur utan um útleigu í síma 595 9100 en gjaldskrá má nálgast hér neðar.
Markmið fræðslustarfs í Gróttu
Markmiðið með Fræðasetrinu er að náttúra og umhverfi Seltjarnarness nýtist á fjölbreyttan hátt, fyrir börn og fullorðna. Staðurinn er tilvalinn til útivistar og inniveru, námskeiða, vettvangsferða, funda o.fl. Útikennsla er í mörgum skólum orðin veigamikill þáttur og gefur möguleika á að nýta umhverfið í kennslu t.d. í íslensku, myndmennt, stærðfræði, náttúrufræði og samfélagsfræði.
Helstu markmiðin með Fræðasetrinu eru að náttúra og umhverfi Gróttu nýtist nemendum og íbúum Seltjarnarness til:
- Menntunar og útikennslu í náttúrufræði, samfélagsfræði, sögu, myndmennt, umhverfismennt, lífsleikni og fleiri greinum.
- Að upplifa, skynja og skilja náttúruna og umhverfið með hjálp markvissra leiðbeininga og leiðsagnar og kennslu á vettvangi.
- Að læra að njóta útivistar, aðlagast útilífi og umgengni við náttúruna.
- Að styrkja félagstengsl og samstarf nemenda.
- Að styrkja nám í ofantöldum greinum í skólunum með endurskipulagningu og aukinni útikennslu.
- Að styrkja almenningsfræðslu um umhverfi og náttúru Seltjarnarness.
- Að störf fræðimanna í Gróttu styrki fræðslustarfið bæði með beinum og óbeinum hætti.