Bæjarstjórn - 566. fundur - 15.01.2003

566. fundur 15. janúar 2003

Miðvikudaginn 15. janúar 2003 kom bæjarstjórn Seltjarnarness saman til fundar í fundarsal sínum að Austurströnd 2, Seltjarnarnesi kl. 17:00.

Mættir voru: Jónmundur Guðmarsson, Bjarni Torfi Álfþórsson, Ásgerður Halldórsdóttir, Sunneva Hafsteinsdóttir, Guðrún Helga Brynleifsdóttir, Árni Einarsson og Inga Hersteinsdóttir.

Fundi stýrði Ásgerður Halldórsdóttir.

Fundargerð ritaði Stefán Bjarnason

Fulltrúar Neslistans í bæjarstjórn Seltjarnarness leggja fram eftirfarandi bókun vegna tillögu sem Neslistinn lagði fram á fundi bæjarstjórnar 18.12.2002

Það er með ólíkindum að sjá eftir að tillaga NESLISTANS sem var samþykkt samhljóða á 565. fundi bæjarstjórnar frá 18. desember um að fundargerðir skulu ekki birtar á netinu án þess að fyrirvari sé gerður um að viðkomandi fundargerð hafi ekki hlotið samþykki, að sjá fundargerðina birta án nokkurs fyrirvara á heimasíðu bæjarins í byrjun árs án auðkenningar. Skipta samþykktir bæjarstjórnar engu máli?

Guðrún Helga Brynleifsdóttir Sunneva Hafsteinsdóttir Árni Einarsson
(sign) (sign) (sign)

Bæjarstjóri lagði fram eftirfarandi bókun.
Farið var að tillögu bæjarstjórnar eins og glöggt má sjá á heimasíðu bæjarins.

Jónmundur Guðmarsson
(sign)

Fulltrúar Neslistans ítreka fyrri bókun efnislega og viðbrögð bæjarstjóra vekja furðu.

Guðrún Helga Brynleifsdóttir Sunneva Hafsteinsdóttir Árni Einarsson
(sign) (sign) (sign)

Fundarmenn urðu sammála um að beina því til umsjónarmanns heimasíðu að sett verði afgerandi merking á haus ósamþykktra fundargerða t.d. með greinilegu flaggi þar sem á stæði “ósamþykkt”.

Í lið 2 í fundargerð 565. fundar þar sem Neslistinn lagði fram bókun við afgreiðslu fjárhagsáætlunar, hefur láðst að skrá eftirfarandi undirskrift fulltrúa Neslistans undir bókunina:

Guðrún Helga Brynleifsdóttir Sunneva Hafsteinsdóttir Árni Einarsson
(sign) (sign) (sign)

Varðandi lið 19 í fundargerð 565.
Fulltrúar NESLISTANS leggja fram eftirfarandi bókun vegna svara bæjarstjóra um nýtt skipurit sem lagt var fram á fundi bæjarstjórnar 18.12.2002.

Vinnubrögð meirihlutans við að koma á nýju skipuriti hjá bæjarfélaginu er með ólíkindum. Reglur bæjarmálasamþykktar Seltjarnarnesbæjar, samþykktir um jafnréttismál eru þverbrotnar. Svar bæjarstjóra á 565. fundi bæjarstjórnar hinn 18. desember s.l. við 1. lið fyrirspurnar NESLISTANS, sem bornar voru fram á 564. bæjarstjórnarfundi hinn 27. nóvember 2002, sýnir að bæjarstjóri annaðhvort þekkir ekki bæjarmálasamþykkt fyrir Seltjarnarnesbæ, eða þverbrýtur þær reglur af ásetningi. Hvorttveggja jafn alvarlegt mál. Bæjarstjóri vitnar í 55. gr. og segir að það sé hlutverk bæjarstjóra að ráða í stjórnunarstöður bæjarins. Þetta er alrangt hjá bæjarstjóra það er bæjarstjórn sem hefur það hlutverk með höndum, en ekki bæjarstjóri. Það er gríðarlegur munur á þessu. Það er mjög alvarlegt mál ef bæjarstjóri þekkir ekki eða virðir ekki hvaða málefni verður skýlaust að bera undir bæjarstjórn. Bæjarstjórn er fjölskipað stjórnvald sem fær umboð sitt í lýðræðislegum kosningum hverju sinni. Bæjarfulltrúar meirihlutans virðast og skeytingalausir gagnvart þeim reglum sem ber að starfa eftir og er það sorglegt að horfa á bæjarfulltrúa meirihlutans “stimpla” gagnrýnislaust gerðir bæjarstjórans eftirá. Meirihlutanum er í lofa lagið að koma sínum málum í gegn með réttu formi og lýðræðislegum vinnubrögðum.

Guðrún Helga Brynleifsdóttir Sunneva Hafsteinsdóttir Árni Einarsson
(sign) (sign) (sign)

Bæjarstjóri lagði fram eftirfarandi bókun:

Fyrir liggur staðfesting bæjarlögmanns á að nýtt skipurit er í samræmi við bæjarmálasamþykkt. Sú staðfesting var lögð fram á bæjarstjórnarfundi í nóvember síðastliðnum.

Jónmundur Guðmarsson
(sign)

Fulltrúar Neslistans lögðu fram eftirfarandi bókun:

Álit bæjarlögmanns lýtur ekki að þeim efnisatriðum sem greinir í bókun Neslistans um þetta málefni.

Guðrún Helga Brynleifsdóttir Sunneva Hafsteinsdóttir Árni Einarsson
(sign) (sign) (sign)

1. Lögð var fram fundargerð 284. fundar Félagsmálaráðs dagsett 19. desember 2002 og var hún í 18. liðum. Einnig var lögð fram greinargerð Félagsþjónustu Seltjarnarnesbæjar frá desember 2002 um upplýsingar um þjónustu við aldraða á Seltjarnarnesi.
Til máls tóku: Jónmundur Guðmarsson, Árni Einarsson, Inga Hersteinsdóttir og Sunneva Hafsteinsdóttir.

Fulltrúar Neslistans leggja fram eftirfarandi tillögu:
Bæjarstjórn samþykkir að skipa starfshóp til þess að móta tillögur að aukinni og endurbættri þjónustu við aldraða á Seltjarnarnesi og leggja fyrir bæjarstjórn eigi síðar en 1. júní 2003. Tillögurnar verða hafðar til hliðsjónar við mótun heildarstefnu varðandi þjónustu við aldraða á Seltjarnarnesi. Áhersla verði lögð á að aldraðir geti búið sem lengst á eigin heimili með stuðningi og fjölbreyttum úrræðum til dvalar utan heimilis um lengri eða skemmri tíma. Tillögurnar feli einnig í sér hvernig best verði staðið að og hlúð að félags- og tómstundastarfi aldraðra, heilsurækt og annarri nauðsynlegri þjónustu.
Í starfshópnum sitji auk félagsmálastjóra, eins fulltrúa frá Neslista og eins fulltrúa frá D-lista, tveir fulltrúar eldri borgara á Seltjarnarnesi.

Greinargerð: Fyrir liggur nýleg úttekt á þjónustu Seltjarnarnesbæjar við aldraða. Þar er einnig sett fram áætluð þjónustuþörf til næstu ára á ýmsum sviðum þeirrar þjónustu. Samkvæmt samantektinni eru aldraðir stækkandi hópur á Seltjarnarnesi sem taka verður aukið tillit til við ákvörðun um þjónustu af hálfu bæjarfélagsins og mikilvægt að aldraðir taki þátt í stefnumótun um eigin mál.

Mikilvægt er að vinna að tillögum á þjónustu við aldraða samhliða endurskoðun á aðalskipulagi sem nú er hafin, þar sem m.a. verður að taka afstöðu til byggingar hjúkrunarheimilis fyrir Seltirninga og hugsanlega uppbyggingu á annars konar þjónustu fyrir aldraða.

Árni Einarsson Guðrún Helga Brynleifsdóttir Sunneva Hafsteinsdóttir
(sign) (sign) (sign)

Tillögunni var vísað til Félagsmálaráðs til umsagnar. Tillagan verður síðan tekin fyrir á næsta fundi bæjarstjórnar.
Fundargerðin gaf ekki tilefni til samþykktar

2. Lögð var fram fundargerð 268. (6.) fundar Æskulýðs- og íþróttaráðs Seltjarnarness dagsett 7. janúar 2003 og var hún í 7 liðum.
Til máls tóku: Sunneva Hafsteinsdóttir, Ásgerður Halldórsdóttir, Árni Einarsson, Guðrún Helga Brynleifsdóttir, Jónmundur Guðmarsson og Inga Hersteinsdóttir.