1024. Bæjarstjórnarfundur var haldinn miðvikudaginn 15. apríl 2026, kl. 17:00 þegar að bæjarstjórn Seltjarnarness kom saman til fundar í fundarsal sínum að Austurströnd 2.
Fundinn sátu: Ragnhildur Jónsdóttir (RJ), Magnús Örn Guðmundsson (MÖG), Þór Sigurgeirsson (ÞS), Dagbjört Snjólaug Oddsdóttir (DSO), Sigurþóra Bergsdóttir, Björg Þorsteinsdóttir (BÞ), og Bjarni Torfi Álfþórsson (BTÁ). Gestur fundarins var Sturla Jónsson (SJ), endurskoðandi.
Fundargerð ritaði: Svava G. Sverrisdóttir.
Fundurinn er sendur út samtímis á netinu og fundagerð birt á heimasíðu bæjarins.
Ragnhildur Jónsdóttir forseti bæjarstjórnar setti fund og stjórnaði.
Gengið var til dagskrár og fyrir tekið:
1. Fundargerð 191. fundar bæjarráðs
Fundargerðin er lögð fram til samþykktar.
Bæjarstjórn samþykkir fundargerðina, sem er í 1 lið, samhljóða.
2. Ársreikningur Seltjarnarnesbæjar og stofnana árið 2025 – fyrri umræða
Á fundinn undir þessum dagskrárlið er mættur Sturla Jónsson, endurskoðandi frá Grant Thornton. Hann kynnti ársreikning bæjarins og stofnana hans fyrir árið 2025.
Forseti gaf orðið laust og fór fram umræða um ársreikninginn eins og hann liggur fyrir.
Bæjarstjóri lagði til að vísa ársreikningnum til síðari umræðu í bæjarstjórn.
Bæjarstjórn samþykkir samhljóða að vísa ársreikningi Seltjarnarnesbæjar og stofnana 2025 til annarrar og síðari umræðu á næsta fundi bæjarstjórnar sem er 29. apríl 2026.
Til máls tóku: ÞS, SB, BTÁ, SJ og MÖG
Bókun: meirihluta Sjálfstæðisflokks
Kjarasamningar lita traustan rekstur Seltjarnarnesbæjar
Rekstrarhagnaður samstæðu Seltjarnarnesbæjar, A- og B- hluta var jákvæður um tæplega 200 milljónir fyrir fjármagnsliði á síðasta ári. Var rekstrarniðurstaðan þó verri en áætlanir gerðu ráð fyrir, ekki síst vegna kjarasamninga við kennara sem gerðir voru í upphafi árs. Afkoma samstæðunnar var neikvæð um liðlega 350 milljónir. Þrátt fyrir þetta má sjá mikinn bata í grunnrekstri bæjarins. Haldið var áfram með hagræðingu og uppbyggingu af ábyrgð. Við viljum þakka starfsfólki Seltjarnarnesbæjar fyrir gott samstarf, útsjónarsemi og ráðdeild á liðnu ári.
Fræðslumál og uppeldismál lang fyrirferðamest
Skatttekjur námu rumlega sex milljörðum og jukust um rúmlega 500 milljónir milli ára. Sem fyrr voru fræðslu- og uppeldismál langfyrirferðamest, en þau námu 3,6 milljörðum eða 60% af skatttekjum. Rekstur félagsþjónustu nam um 19% skatttekjum og æskulýðs- og íþróttamál um 14,5%. Gjaldfærslur vegna mygluframkvæmda í grunnskólabyggingum bæjarins snarminnkuðu milli ára þó merki þeirra sjáist enn í uppgjörinu en heildarkostnaður við niðurrif og uppbyggingu í bæði Mýrarhúsaskóla og Valhúsaskóla nemur rúmum 1,2 milljarði á síðustu misserum. Annað sem skýrir að rekstur A-hluta var undir væntingum er rekstur málaflokks fatlaðs fólks sem er þungur á Seltjarnarnesi.
Fjárfest í skólum
Ánægjulegt er að sjá fjölgun leikskólabarna á Seltjarnarnesi, en opnuð var ný leikskóladeild í kirkjunni haustið 2025 sem hafði töluverðan kostnað í för með sér, eða tæpar 35 milljónir. Framkvæmdir við byggingu nýs leikskólahúsnæðis að Suðurströnd 1 hófust í október og er stefnt að verklokum sumarið 2027. Um verður að ræða eina glæsilegustu leikskólabyggingu landsins. Þá hófst vinna við nýtt leikskólamódel með nýju starfs- og námsumhverfi í leikskólum bæjarins sem hafði kostnað í för með sér. Félagsmiðstöðin Selið var flutt í glæsilega aðstöðu í Valhúsaskóla og er aðstaða þar til fyrirmyndar. Samþætting félagsmiðstöðvar við skólabygginguna var talin skynsamleg lausn með bætt aðgengi að leiðarljósi. Þótt framkvæmdum í Mýrarhúsaskóla og Valhúsaskóla sé að mestu lokið standa enn eftir ákveðin verkefni, þar á meðal utanhússklæðning á Valhúsaskóla og endurnýjun þaks á Mýrarhúsaskóla. Áformað er að forgangsraða þeim verkefnum sem eftir eru á skynsamlegan hátt.
Fjárhagsleg staða sterk
Heildareignir A- og B-hluta voru samkvæmt efnahagsreikningi 11,3 milljarðar og nema skuldir samstæðunnar 8,6 milljörðum. Þar af eru skuldir við lánastofnanir 4,2 milljarðar og lífeyrisskuldbinding 2,7 milljarðar. Umfang lífeyrisskuldbindingarinnar er afar stórt í öllum skilningi og hafa breytingar á henni haft umtalsverð áhrif á rekstur bæjarins á síðustu árum. Nemur skuldbindingin nú 24% af heildareignum bæjarins, og í A-hluta er hún enn fyrirferðameiri eða 28%. Þetta leiðir til mun hærri gjaldfærslna í A-hluta við launahækkanir en gengur og gerist hjá sveitarfélögum á höfuðborgarsvæðinu. Þrátt fyrir þetta er fjárhagur bæjarins sterkur og er skuldaviðmið bæjarins 90% en má vera að hámarki 150% sem sýnir fjárhagslegan styrk efnahagsreikningsins.
Traustur rekstur til framtíðar
Þrátt fyrir töluverða ágjöf síðustu ára hefur tekist að stýra rekstri bæjarins örugglega í gegnum þær áskoranir sem upp hafa komið. Tekjur bæjarins eru sterkar og eru samanlagt útsvar og fasteignaskattar með því hæsta sem gerist á landinu mælt á hvern íbúa. Veltufé frá rekstri mun styrkjast nú þegar stærstu kjarasamningarnir eru í höfn og gefur það aukið svigrúm til frekari fjárfestinga eða niðurgreiðslu skulda.
Bæjarfulltrúar Sjálfstæðisflokksins.
Bókun minnihluta Samfylkingar og óháðra:
Niðurstaða A-sjóðs er neikvæð um rúmlega 450 milljónir króna, sem sýnir að grunnrekstur sveitarfélagsins er ekki sjálfbær. Þá er veltufé frá rekstri einungis 1%, sem gefur til kynna að reksturinn skilar nánast engu handbæru fé til að standa undir fjárfestingum eða skuldbindingum. Lausafjárstaða er jafnframt veik, þar sem veltufjárhlutfall er 0,5. Það bendir til þess að sveitarfélagið hafi ekki nægjanlegt svigrúm til að mæta skammtímaskuldbindingum án frekari lántöku. Skuldaviðmið er komið í 92%, sem telst hátt og getur takmarkað möguleika sveitarfélagsins til framtíðarfjárfestinga. Enn alvarlegra er að hlutfall veltufjár frá rekstri af afborgunum skulda er einungis 0,4, sem þýðir að reksturinn stendur ekki undir nema hluta af skuldagreiðslum. Sérstaka athygli vekur að hlutfall langtímaskulda af veltufé frá rekstri er 69,9, sem þýðir að það tæki sveitarfélagið nær 70 ár að greiða niður skuldir miðað við núverandi rekstrargetu. Slík staða er augljóslega ekki sjálfbær til lengri tíma. Þessar lykiltölur sýna að rekstur sveitarfélagsins er kominn út fyrir sjálfbær mörk og því nauðsynlegt er að grípa til aðgerða til að bæta rekstrarniðurstöðu bæjarsjóðs.
Sigurþóra Bergsdóttir - bæjarfulltrúi Samfylkingar og óháðra
Bjarni Torfi Álfþórsson - bæjarfulltrúi Samfylkingar og óháðra
Björg Þorsteinsdóttir - bæjarfulltrúi Samfylkingar og óháðra
3. Fundargerð 346. fundar skólanefndar
Fundargerðin lögð fram.
Eftirfarandi liður í fundargerðinni er lagður fram til staðfestingar:
6. 2019010209 – Endurskoðun skólastefnu Seltjarnarnesbæjar
Hildigunni Gunnarsdóttur eru færðar þakkir fyrir gott starf við endurskoðun skólastefnunnar.
Skólanefnd samþykkir Menntastefnu Seltjarnarnesbæjar 2026-2030 og vísar henni til bæjarstjórnar til staðfestingar.
Bæjarstjórn samþykkir afgreiðslu skólanefndar á 6. lið fundargerðarinnar samhljóða.
Til máls tóku: RJ og DSO
4. Fundargerð 996. fundar stjórnar Sambands ísl. sveitarfélaga
Fundargerðin lögð fram.
5. Fundargerð 144. fundar svæðisskipulagsnefndar
Fundargerðin lögð fram.
6. Fundargerð 90. fundar stjórnar Samtaka orkusveitarfélaga
Fundargerðin lögð fram.
7. Fundargerð 279. fundar stjórnar Slökkviliðs höfuðborgarsvæðisins
Fundargerðin lögð fram.
Til máls tók: SB og ÞS
8. Fundargerð 42. fundar Heilbrigðisnefndar Garðabæjar, Hafnarfjarðar, Kópavogs, Mosfellsbæjar og Seltjarnarness
Fundargerðin lögð fram.
9. Fundargerð 43. fundar Heilbrigðisnefndar Garðabæjar, Hafnarfjarðar, Kópavogs, Mosfellsbæjar og Seltjarnarness
Fundargerðin lögð fram.
10. Fundargerð 422. fundar stjórnar Strætó bs.
Fundargerðin lögð fram.
11. Fundargerð 423. fundar stjórnar Strætó bs.
Fundargerðin lögð fram.
Tillögur og erindi:
a. 2026040130 Bréf til bæjarstjórnar Seltjarnarnesbæjar frá umboðsmanni barna.
Bréf frá Umboðsmanni barna lagt fram.
Bæjarstjórn þakkar fyrir bréfið og vísar erindinu til Gissurar Ara Kristinssonar, verkefnastjóra frístundar og forvarna, og felur honum að koma málinu í farveg í samvinnu við Ungmennaráð Seltjarnarness.
b. Breytingar á skipan í nefndum
Meirihluti Sjálfstæðisflokks leggur fram eftirfarandi tillögu í nefndir og ráð til loka kjörtímabils:
Aðalmaður:
Íþrótta- og tómstundanefnd – Dagbjört Snjólaug Oddsdóttir
Umhverfisnefnd – Örn Viðar Skúlason
Heilbrigðisnefnd Garðabæjar, Hafnarfjarðar, Kópavogs, Mosfellsbæjar og Seltjarnarness – Lárus Gunnarsson
Notendaráð fyrir fatlað fólk – Svana Helen Björnsdóttir og Þór Sigurgeirsson
Varamaður:
Skólanefnd – Elísabet Einarsdóttir, Björn Jóhannesson og Örn Viðar Skúlason
Íþrótta- og tómstundanefnd – Lárus Gunnarsson og Björn Jóhannesson
Umhverfisnefnd – Elísabet Einarsdóttir og Ragnhildur Jónsdóttir
Skipulags – og umferðarnefnd – Ragnhildur Jónsdóttir
Samstarfsnefnd skíðasvæða höfuðborgarsvæðisins - Dagbjört Snjólaug Oddsdóttir
Heilbrigðisnefnd Garðabæjar, Hafnarfjarðar, Kópavogs, Mosfellsbæjar og Seltjarnarness – Þór Sigurgeirsson
Svæðisskipulagsráð SSH – Ragnhildur Jónsdóttir
Stjórn Veitustofnana – Elísabet Einarsdóttir
Notendaráð fyrir fatlað fólk - Dagbjört Snjólaug Oddsdóttir
Minnihluti Samfylkingar og óháðra leggur fram eftirfarandi tillögu í nefndir og ráð 2026 til loka kjörtímabils:
Aðalmaður:
Stjórn Veitustofnana – Karen María Jónsdóttir
Fjölskyldunefnd – Halla Helgadóttir
Skipulags- og umferðanefnd – Garðar Gíslason
Varamaður:
Stjórn Veitustofnana – Sigurþóra Bergsdóttir
Fjölskyldunefnd – Sigurþóra Bergsdóttir
Skipulags- og umferðarnefnd – Sigurþóra Bergsdóttir
c. Svör við fyrirspurnum frá síðasta bæjarstjórnarfundi
Svör bárust frá Þorsteini Guðjónssyni, formanns Golfklúbbs Ness.
Fyrirspurn frá Svönu Helen Björnsdóttur, beint til bæjarstjóra:
Hver er fjöldi félaga í Nesklúbbnum, golfklúbbi Seltjarnarness, með lögheimili á Seltjarnarnesi annars vegar og utan Seltjarnarness hins vegar? Hvert er hlutfall félaga með lögheimili á Seltjarnarnesi?
Svar:
· Í íþróttafélaginu Golfklúbbur Ness – Nesklúbburinn eru 800 félagsmenn í fullri aðild.
• Þar af eru 489 félagsmenn með lögheimili á Seltjarnarnesi eða 61%.
• Félagar í auka- og krakkaaðild eru 207 og þar af 143 með lögheimili á Seltjarnarnesi eða 69%.
Viðbótarfyrirspurn barst frá Karen Maríu Jónsdóttur:
Hversu marga rástíma hafa félagar í Nesklúbbnum með lögheimili á Seltjarnarnesi nýtt sér síðastliðin 3 ár.
Svar:
Félagar með lögheimili á Seltjarnarnesi hafa nýtt sér 46.786 rástíma á umræddu tímabili.
Daglega sóttu allt að 465 einstaklingar í starfsemi á vegum Nesklúbbsins á Suðurnesi.
d. Ósk um lausn úr bæjarstjórn
Eftirfarandi erindi dagsett 14. apríl 2026 barst til forseta bæjarstjórnar: Vegna flutnings úr sveitarfélaginu óska ég lausnar frá störfum í bæjarstjórn Seltjarnarness, frá og með 16. apríl 2026 og til loka kjörtímabilsins.
Bjarni Torfi Álfþórsson,
Bæjarfulltúi Samfylkingar og óháðra
Bæjarstjórn þakkar Bjarna Torfa fyrir langt, ánægjulegt og farsælt samstarf.
Til máls tóku: BTÁ, RJ, ÞS, MÖG og SB
Fundi slitið kl.: 17:57