1025. Bæjarstjórnarfundur var haldinn miðvikudaginn 29. apríl 2026, kl. 17:00 þegar að bæjarstjórn Seltjarnarness kom saman til fundar í fundarsal sínum að Austurströnd 2.
Fundinn sátu: Ragnhildur Jónsdóttir (RJ), Magnús Örn Guðmundsson (MÖG), Þór Sigurgeirsson (ÞS), Svana Helen Björnsdóttir (SHB), Sigurþóra Bergsdóttir, Guðmundur Gunnlaugsson (GG), og Karen María Jónsdóttir (KMJ). Gestur fundarins var Sturla Jónsson (SJ), endurskoðandi.
Fundargerð ritaði: Svava G. Sverrisdóttir.
Fundurinn er tekinn upp og verður ásamt fundagerð birtur á heimasíðu bæjarins.
Ragnhildur Jónsdóttir forseti bæjarstjórnar setti fund og stjórnaði.
Gengið var til dagskrár og fyrir tekið:
1. Ársreikningur Seltjarnarnesbæjar og stofnana árið 2025 – seinni umræða
Á fundinn undir þessum dagskrárlið er mættur Sturla Jónsson, endurskoðandi frá Grant Thornton. Hann kynnti ársreikning bæjarins og stofnana hans fyrir árið 2025 ásamt endurskoðunarskýrslu.
Forseti gaf orðið laust og fór fram umræða um ársreikninginn eins og hann liggur fyrir.
Bæjarstjóri lagði til við bæjarstjórn að samþykkja ársreikning fyrir árið 2025.
Bæjarstjórn skilar þökkum til starfsfólks bæjarins, fyrir góða vinnu og þeirra þátt í umbótum sem hafa orðið á rekstri bæjarins á árinu 2025.
Forseti bar upp ársreikning bæjarins og stofnana hans í einu lagi til samþykktar. Ársreikningur Seltjarnarnesbæjar og stofnana fyrir árið 2025 er samþykktur samhljóða og afgreiddur skv. 61. gr. sveitarstjórnarlaga nr. 138/2011, sbr. 2. tl. 1. mgr. 18.gr. laganna.
Samþykktinni til staðfestingar er ársreikningurinn undirritaður af viðstöddum bæjarfulltrúum.
Til máls tóku: SB, MÖG, ÞS, KMJ og RJ
Bókun meirihluta Sjálfstæðisflokks
Kjarasamningar lita traustan rekstur Seltjarnarnesbæjar
Rekstrarhagnaður samstæðu Seltjarnarnesbæjar, A- og B- hluta var jákvæður um tæplega 200 milljónir fyrir fjármagnsliði á síðasta ári. Var rekstrarniðurstaðan þó verri en áætlanir gerðu ráð fyrir, ekki síst vegna kjarasamninga við kennara sem gerðir voru í upphafi árs. Afkoma samstæðunnar var neikvæð um liðlega 350 milljónir. Þrátt fyrir þetta má sjá mikinn bata í grunnrekstri bæjarins. Haldið var áfram með hagræðingu og uppbyggingu af ábyrgð. Við viljum þakka starfsfólki Seltjarnarnesbæjar fyrir gott samstarf, útsjónarsemi og ráðdeild á liðnu ári.
Fræðslumál og uppeldismál lang fyrirferðamest
Skatttekjur námu rumlega sex milljörðum og jukust um rúmlega 500 milljónir milli ára. Sem fyrr voru fræðslu- og uppeldismál langfyrirferðamest, en þau námu 3,6 milljörðum eða 60% af skatttekjum. Rekstur félagsþjónustu nam um 19% skatttekjum og æskulýðs- og íþróttamál um 14,5%. Gjaldfærslur vegna mygluframkvæmda í grunnskólabyggingum bæjarins snarminnkuðu milli ára þó merki þeirra sjáist enn í uppgjörinu en heildarkostnaður við niðurrif og uppbyggingu í bæði Mýrarhúsaskóla og Valhúsaskóla nemur rúmum 1,2 milljarði á síðustu misserum. Annað sem skýrir að rekstur A-hluta var undir væntingum er rekstur málaflokks fatlaðs fólks sem er þungur á Seltjarnarnesi.
Fjárfest í skólum
Ánægjulegt er að sjá fjölgun leikskólabarna á Seltjarnarnesi, en opnuð var ný leikskóladeild í kirkjunni haustið 2025 sem hafði töluverðan kostnað í för með sér, eða tæpar 35 milljónir. Framkvæmdir við byggingu nýs leikskólahúsnæðis að Suðurströnd 1 hófust í október og er stefnt að verklokum sumarið 2027. Um verður að ræða eina glæsilegustu leikskólabyggingu landsins. Þá hófst vinna við nýtt leikskólamódel með nýju starfs- og námsumhverfi í leikskólum bæjarins sem hafði kostnað í för með sér. Félagsmiðstöðin Selið var flutt í glæsilega aðstöðu í Valhúsaskóla og er aðstaða þar til fyrirmyndar. Samþætting félagsmiðstöðvar við skólabygginguna var talin skynsamleg lausn með bætt aðgengi að leiðarljósi. Þótt framkvæmdum í Mýrarhúsaskóla og Valhúsaskóla sé að mestu lokið standa enn eftir ákveðin verkefni, þar á meðal utanhússklæðning á Valhúsaskóla og endurnýjun þaks á Mýrarhúsaskóla. Áformað er að forgangsraða þeim verkefnum sem eftir eru á skynsamlegan hátt.
Fjárhagsleg staða sterk
Heildareignir A- og B-hluta voru samkvæmt efnahagsreikningi 11,3 milljarðar og nema skuldir samstæðunnar 8,6 milljörðum. Þar af eru skuldir við lánastofnanir 4,2 milljarðar og lífeyrisskuldbinding 2,7 milljarðar. Umfang lífeyrisskuldbindingarinnar er afar stórt í öllum skilningi og hafa breytingar á henni haft umtalsverð áhrif á rekstur bæjarins á síðustu árum. Nemur skuldbindingin nú 24% af heildareignum bæjarins, og í A-hluta er hún enn fyrirferðameiri eða 28%. Þetta leiðir til mun hærri gjaldfærslna í A-hluta við launahækkanir en gengur og gerist hjá sveitarfélögum á höfuðborgarsvæðinu. Þrátt fyrir þetta er fjárhagur bæjarins sterkur og er skuldaviðmið bæjarins 90% en má vera að hámarki 150% sem sýnir fjárhagslegan styrk efnahagsreikningsins.
Traustur rekstur til framtíðar
Þrátt fyrir töluverða ágjöf síðustu ára hefur tekist að stýra rekstri bæjarins örugglega í gegnum þær áskoranir sem upp hafa komið. Tekjur bæjarins eru sterkar og eru samanlagt útsvar og fasteignaskattar með því hæsta sem gerist á landinu mælt á hvern íbúa. Veltufé frá rekstri mun styrkjast nú þegar stærstu kjarasamningarnir eru í höfn og gefur það aukið svigrúm til frekari fjárfestinga eða niðurgreiðslu skulda.
Bæjarfulltrúar Sjálfstæðisflokksins.
Bókun Samfylkingar og óháðra:
Fulltrúar Samfylkingar og óháðra ítreka mikilvægi þess að sveitarfélagið búi við ábyrga fjármálastjórn. Ársreikningur þessa árs staðfestir því miður þá dapurlegu þróun sem við höfum varað við árum saman. Þegar við horfum til baka á fyrri bókanir okkar, þar sem lagðar voru fram tillögur um heildstæða fjármálaúttekt, endurskoðun á samningum og markvissari tekjuöflun, er ljóst að tækifærin til að gera betur hafa verið látin ónýtt.
Hefði meirihlutinn sýnt þá fyrirhyggju að bregðast við varnaðarorðum okkar fyrr, væri Seltjarnarnesbær á mun öruggari stað í dag.
Í stað þess að auka ekki skuldir og fjárfesta í grunnþjónustu er bærinn fastur í viðvarandi hallarekstri sem hefur nú varað tíu ár. Uppsafnaður halli síðustu tíu ára upp á 3,7 milljarða króna á A-hluta er ekki hægt að skýra með ófyrirséðum áföllum, þetta er mynstur sem því miður virðist ekki vera að breytast. Skuldir á mann á Seltjarnarnesi voru í lok árs 2025 1.873.000 krónur en voru í lok árs 2024 1.157.000 krónur. Það er 716 þúsund króna hækkun á einu ári.
Þessi staða er ávísun á skert þjónustustig og skort á fjárfestingargetu til framtíðar.
Á grafinu má sjá hvernig halli hefur aukist á síðustu 10 árum. Ef útsvar hefði verið hærra hefði staðan verið betri, með hámarksútsvari væri munurinn 1 milljarður og vaxtagreiðslur upp á 40 milljónir á ári ekki að íþyngja rekstrinum.graf_rekstur-2015-2025.png
Núverandi meirihluta hefur gengið illa að fylgja áætlunum og er árið 2025 engin undantekning. Þessi ársreikningur sýnir 350 milljóna verri niðurstöðu en endurskoðuð áætlun gerði ráð fyrir á A hluta. Ef skoðuð er upprunaleg áætlun um rekstur bæjarins er niðurstaðan um 500 millljónum verri en áætlanir gerðu ráð fyrir.
Að auki hefur eigið fé sveitarfélagsins rýrnað stöðugt síðustu ár. Frá árinu 2021 hefur eigið fé rýrnað um 1,2 milljarða.
Staðan á handbæru fé er einnig mikið áhyggjuefni. Handbært fé A sjóðs fer úr 300 mkr í byrjun árs í 14 mkr og fyrir A og B sjóð er fallið frá 354 mkr í 65 mkr. Þetta þýðir að bærinn á fyrir um það bil þremur dögum af rekstri. Sem þýðir aftur að ekkert má fara úrskeiðis og þörf er á frekari lántöku til þess eins að fjármagna grunnþjónustu. Allt er þetta á sama tíma og ein dýrasta framkvæmd bæjarins síðustu áratuga er í gangi.
Við sjáum hvert stefnir. Með óbreyttri stjórn stefnir bærinn fjárhagslega í óefni þar sem rekstrarrýmið verður svo lítið að eina leiðin út verður annað hvort harkalegur niðurskurður á lögbundinni þjónustu eða verulegar skattahækkanir.
Sú fjárhagslega óstjórn sem hér er viðhöfð er ekki aðeins að skuldsetja bæjarsjóð í dag, heldur erum við í raun að veðsetja framtíðartækifæri unga fólksins á Seltjarnarnesi, sem mun á endanum sitja uppi með reikninginn
Sigurþóra Bergsdóttir - bæjarfulltrúi Samfylkingar og óháðra
Karen María Jónsdóttir - bæjarfulltrúi Samfylkingar og óháðra
Guðmundur Gunnlaugsson - bæjarfulltrúi Samfylkingar og óháðra
2. Fundargerð 192. fundar bæjarráðs
Fundargerðin er lögð fram til samþykktar.
Bæjarstjórn samþykkir fundargerðina, sem er í 4 liðum, samhljóða.
Til máls tóku: SB og MÖG
3. Fundargerð 167. fundar menningarnefndar
Fundargerðin lögð fram.
4. Fundargerð 485. fundar fjölskyldunefndar
Fundargerðin lögð fram.
5. Fundargerð 454. fundar íþrótta- og tómstundanefndar
Fundargerðin lögð fram.
Til máls tóku: GG og ÞS
6. Fundargerð 436. fundar samstarfsnefndar skíðasvæða höfuðborgarsvæðisins
Fundargerðin lögð fram.
7. Fundargerð 145. fundar stjórnar svæðisskipulagsnefndar
Fundargerðin lögð fram.
8. Fundargerð 626. fundar stjórnar SSH
Fundargerðin lögð fram.
Tillögur og erindi:
a. Tilnefning aðalmanns og varamanns í fjölskyldunefnd og varamanns í stjórn Veitustofnana
Meirihluti Sjálfstæðisflokks leggur fram eftirfarandi tillögu í nefndir og ráð til loka kjörtímabils:
Aðalmaður:
Fjölskyldunefnd – Svana Helen Björnsdóttir
Varamaður:
Fjölskyldunefnd – Þór Sigurgeirsson
Minnihluti Samfylkingar og óháðra leggur fram eftirfarandi tillögu í nefndir og ráð 2026 til loka kjörtímabils:
Varamaður:
Stjórn Veitustofnana – María Stefánsdóttir
Fundi slitið kl.: 18:06