299. (38) fundur æskulýðs- og íþróttaráðs Seltjarnarness, haldinn 25. október, 2005 kl. 17:30 í Íþróttamiðstöð Seltjarnarness.
Mætt voru: Ásgerður Halldórsdóttir, Árni Einarsson, Sigrún Edda Jónsdóttir, Sjöfn Þórðardóttir, Nökkvi Gunnarsson og Margrét Sigurðardóttir.
Fundargerð ritaði: Árni Einarsson.
Dagskrá:
- Gervigrasvöllur – kaup á yfirborðsefni.
- 15 ára afmæli Selsins.
- Erindi frá skákfélaginu Hróknum.
- Erindi frá Íþróttafulltrúa Gróttu.
- Erindi frá foreldrum barna í íþróttum hjá Gróttu.
- Erindi frá meistaraflokki Gróttu í knattspyrnu.
- Önnur mál.
- Lagt fram tilboð frá fyrirtækinu Metratron ehf. um verð á yfirborðsefni á knattspyrnuvöllinn við Suðurströnd ásamt öryggissvæði og æfingavöll. Samþykkt að taka tilboðinu, enda er það vel innan kostnaðaráætlunar, og framkvæmdastjóra falið að ganga frá málinu og panta gervigrasið.
- Margrét sagði frá fyrirhugaðri afmælisdagskrá í Selinu í tilefni af 15 ára afmælis félagsmiðstöðvarinnar á þessu ári. Bæjarbúum verður boðið til afmælisveislu 27. október nk. kl. 17-19 og hefur afmælisboði verið dreift til bæjarbúa. Útvarp Ebbi verður með útsendingu í eina viku í tilefni afmælisins.
Samþykkt að gefa Selinu myndbandsupptökuvél í tilefni afmælisins.
Margrét sagði frá starfinu og fagnaði auknum starfskrafti sem nýlega kom til framkvæmda í Selinu. Lét hún vel af starfinu og sagði aðsókn góða. - Lagt fram erindi frá skákfélaginu Hróknum.Samþykkt að gerast gullbakhjarl félagsins og óska eftir því að félagið standi fyrir skákkeppni í bænum eftir áramót.
- Lagt fram erindi frá Íþróttafulltrúa Gróttu um styrk til kynnis- og æfingarferðar fyrir fjóra til Danmerkur.
Samþykkt að veita 60 þúsund króna styrk til ferðarinnar. - Lagt fram erindi frá foreldrum barna sem stunda íþróttir hjá Gróttu um að ÆSÍS. taki þátt í kostnaði vegna samræmingar á æfingabúningum allra deilda félagsins.
Samþykkt að styrkja verkefnið um sem nemur eitt þúsund krónum á hvern búning sem keyptur er til næstu áramóta í ljós mikilvægis þess að styrkja og efla ímynd félagsins - Lagt fram erindi frá meistaraflokksráði Gróttu í knattspyrnu karla þar sem óskað er eftir hækkun á þjálfarastyrk. ÆSÍS telur jákvætt í erindið og mun fjalla um það í tengslum við gerð fjárhagsáætlunar fyrir árið 2006.
- Lagður fram fræðslubæklingur ÍSÍ. um siðfræði íþróttaþjálfarans og mikilvægi þess að þjálfarar í íþróttum taki fyrirmyndarhlutverk sitt gagnvart iðkendum alvarlega, ekki síst þegar iðkendur eru börn og unglingar. Í sumum tilvikum eru þjálfarar lítið eldri en iðkendur og þá kann að reyna sérstaklega á hlutverk og ábyrgð þjálfarans. Í bæklingi ÍSÍ eru settar fram nokkrar samskiptareglur til viðmiðunar fyrir íþróttaþjálfara, m.a. um að þjálfarar láti iðkendur aldrei sjá sig við reykingar, neyslu munn- eða neftóbaks og neyslu áfengis og annarra vímuefna.
ÆSÍS beinir því til aðalstjórnar Gróttu að umræddur bæklingur sé sérstaklega kynntur fyrir þjálfurum og stjórnum deilda innan félagsins og bendir á að um er að ræða mikilvæga þætti til að viðhalda stöðu félagsins sem fyrirmyndarfélags ÍSÍ frá 21. apríl á þessu ári.
Fundi slitið kl. 18.40.