91. fundur Menningarnefndar Seltjarnarness haldinn þriðjudaginn 9. september 2008, kl. 17:10 í bæjarstjórnarsal Seltjarnarness.
Mættir voru: Sólveig Pálsdóttir formaður, Bjarki Harðarson varaformaður, Bryndís Loftsdóttir, Unnur Pálsdóttir, Valgeir Guðjónsson og Ellen Calmon fræðslu- og menningarfulltrúi.
Fundi stýrði Sólveig Pálsdóttir.
Fundargerð ritaði Ellen Calmon.
Þetta gerðist:
- Nefndin samþykkti tillögu formanns um að ný staðsetning útilistaverksins ,,Skyggnst bak við tunglið” eftir Sigurjón Ólafsson verði á grasbletti fyrir framan raðhúsalengjuna við Selbraut 2-8. Er erindinu vísað til skiplags- og mannvirkjanefndar.
Bókun með erindi til skipulags- og mannvirkjanefndar.
,,Við val á nýjum stað fyrir verkið þarf að hafa í huga: 1) Engin útilistaverk í eigu bæjarins eru austan megin við Eiðistorg. 2) Listaverkið þarf að vera staðsett þar sem flestir njóta þess. 3) Nokkuð gott rými þarf að vera í kringum verkið.
Tillaga menningarnefndar uppfyllir þessi þrjú atriði. Einnig er það álit nefndarinnar að fyrrgreind staðsetning myndi auka menningarlega ásýnd bæjarins er komið er inn í bæinn. Þá hafa fulltrúar safns Sigurjóns Ólafssonar lýst yfir ánægju með flutning verksins og gera engar athugasemdir við hugmyndir um fyrrgreinda staðsetningu.“
- Farið var yfir þær gagngeru endurbætur sem gerðar hafa verið á Náttúrugripasafni Seltjarnarness. Gerð var grein fyrir aukafjárveitingu til framkvæmdanna.
- Farið var yfir tillögur frá auglýsingastofu varðandi útlit og útgáfu á menningarstefnu Seltjarnarnesbæjar. Fræðslu- og menningarfulltrúa falið að vinna áfram að verkefninu.
- Formaður lagði fram tillögur varðandi listaverkakaup á árinu. Nefndin samþykkir að kaupa olíumálverk eftir Kristínu Gunnlaugsdóttur bæjarlistamann Seltjarnarness 2008. Viðmiðunarstærð verksins er 170 cm x 200 cm. Gert er ráð fyrir að verkinu verði fundinn staður í nýju Lækningaminjasafni Íslands. Formanni nefndarinnar er falið að ganga til samninga við Kristínu um að vinna verkið sérstaklega með þá staðsetningu í huga. Greiðslu verksins skal í síðasta lagi verða lokið í mars 2010. Kaupin eru í samræmi við þá stefnu að bærinn eigi verk eftir þá listamenn sem hlotið hafa nafnbótina bæjarlistamaður Seltjarnarness.
- Rætt var um komandi menningarhátíð og samþykkt að haldinn verði sérstakur vinnufundur menningarnefndar nú í september vegna hátíðarinnar.
Fundargerð upplesin og samþykkt.
Fleira ekki tekið fyrir og fundi slitið kl.19:00.
EC
Sólveig Pálsdóttir (sign)
Bjarki Harðarson (sign)
Bryndís Loftsdóttir (sign)
Unnur Pálsdóttir (sign)
Valgeir Guðjónsson (sign)