Þann 12. ágúst 2026 verður almyrkvi á sólu sjáanlegur frá Íslandi í fyrsta sinn síðan 1954 og er þetta er jafnframt fyrsti almyrkvinn sem sést frá höfuðborgarsvæðinu síðan 17. júní 1433.
Heima er best!
Seltirningar eiga því láni að fagna að vera í einstakri stöðu til að upplifa þennan sjaldgæfa náttúruviðburð hér heima á Nesinu en almyrkvinn verður sýnilegur hvað lengst á Seltjarnarnesi af öllu höfuðborgarsvæðinu eða í allt að 1,08 mínútu og horfa skal í suð-vestur. Ferlið í heild stendur yfir í um tvær klukkustundir með deildarmyrkva í um klukkustund fyrir og eftir almyrkvann sjálfan. Seltjarnarnesbær hvetur íbúa til að njóta almyrkvans við heimili sín eða í göngufæri í nærumhverfinu og fara ekki í stutt erindi á bíl að nauðsynjalausu á meðan á atburðinum stendur. Með því má draga úr óþarfa umferð, létta álagi af innviðum og viðbragðsaðilum og stuðla að öruggri og ánægjulegri upplifun fyrir alla.
Nauðsynlegt að nota örugg sólmyrkvagleraugu
Nauðsynlegt er að nota örugg og vottuð sólmyrkvagleraugu til að fylgjast með almyrkvanum. Örugg sólmyrkvagleraugu eru með sérstökum síum sem draga úr hættulegri útfjólublárri og innrauðri geislun sem vernda augun. Aðeins á meðan almyrkvi stendur yfir, þegar tunglið hylur sólina að fullu, er öruggt að taka þau af í stutta stund. Setjið þau aftur upp um leið og einhver hluti sólarinnar verður sýnilegur.
Sólmyrkvagleraugu fyrir leik- og grunnskólabörn í boði Seltjarnarnesbæjar
Til að börn á Seltjarnarnesi geti upplifað þennan einstaka atburð á öruggan hátt ætlar Seltjarnarnesbær gefa öllum börnum á leik- og grunnskólaaldri með lögheilmili á Seltjarnarnesi, örugg og vottuð sólmyrkvagleraugu til að vernda augun. Sólmyrkvagleraugun má nálgast í afgreiðsluna á Bókasafni Seltjarnarness næstu daga og eru foreldrar og forráðamenn hvattir til að gera það tímanlega.
Götulokanir á Seltjarnarnesi í öryggisskyni
Í ljósi þeirra forréttinda sem við Seltirningar búum við varðandi sýnileika almyrkvans hér á höfuðborgarsvæðinu, er viðbúið að fjöldi fólks geri sér ferð á Seltjarnarnesið til að upplifa þennan stórmerkilega atburð. Þó hann verði sýnilegur nær alls staðar á Seltjarnarnesinu má gera ráð fyrir að ferðamenn og íbúar sem vilja upplifa í sameiningu, safnist saman á Vestursvæðunum, golfvellinum, út við Snoppu og á Valhúsahæð. Lokað verður út í Gróttu í öryggisskyni skv. tilmælum Náttúruverndarstofnunar og skoðun lögreglunnar á höfuðborgarsvæðinu auk þess sem flóð verður á þessum tíma.
Í samráði við lögregluna á höfuðborgarsvæðinu verða tímabundnar götulokanir á Seltjarnarnesi frá kl. 15 - 19 þennan dag og mun Seltjarnarnesbær m.a. njóta liðsinnis Björgunarsveitarinnar Ársæls við þungalokanir.
- Suðurströndinni verður lokað í báðar átt frá innkeyrslunni að bílastæðinu við sundlaugina og út á golfvöll.
- Norðurströndinni verður lokað frá Lindarbrautinni og út að Gróttu.
- Ekki verður hægt að keyra frá þvergötum inn á Suðurströnd og Norðurströnd á meðan.
- Hins vegar verður mögulegt að keyra frá Norðurströnd og Lindarbraut inn í hverfin sbr. á brautirnar og í Nesbala og sömu leið til baka.
- Íbúar og aðrir gestir eru hvattir til að ganga eða hjóla þangað sem það ætlar að horfa á almyrkvann verði það ekki frá heimilinu.
- Strætó mun keyra um Seltjarnarnesið en mögulega verður tímabundin breyting á leiðakerfinu sem verður þá auglýst sérstaklega.
- Bent verður á bílastæðin við Eiðistorg, Austurströnd, íþróttamiðstöðina og skólahúsnæðin fyrir þá sem koma akandi inn á Seltjarnarnesið.
- Fólk er hvatt til að kynna sér vel umferðartakmarkanir og virða leiðbeiningar og lokanir sem eru gerðar í öryggisskyni.
- Sjúkraflutningabíll verður staðsettur á Seltjarnarnesi á meðan á lokununum stendur.
Sjálfvirk götulýsing afvirkjuð:
Búið er að gera ráð fyrir sólmyrkvanum í sjálfvirku götuljósastjórnkerfi (inteliLIGHT) á höfuðborgarsvæðinu sem þýðir að götuljósin munu ekki kveikja á sér á meðan á sólmyrkvanum stendur og því mun ljósmengun frá götuljósunum ekki trufla sýn.
Salernisaðstaða
Seltjarnarnesbær hefur gert ráðstafanir og verða þurrsalerni sett upp á fjórum stöðum á Seltjarnarnesi þ.e. við Valhúsahæð, við Snoppu, á bílastæðið við Bakkatjörn og á bílastæðið við golfvöllinn.
Veður og upplifun
Ekki er nauðsynlegt að himinninn sé alveg heiðskír til að fylgjast með sólmyrkvanum. Háskýjaslæða truflar ekki en meira ef það er rigning og þungbúið. Jafnvel þótt skyggni verði ekki fullkomið verður birtubreytingin sjálf einstök þegar myrkur skellur á í stutta stund.
Nákvæmar tímasetningar almyrkvans á Seltjarnarnesi:
Rauðu línurnar sýna götulokanir og gulu punktarnir lokun á þvergötum sem liggja inn á Suðurströndina og Norðurströndina.
Opinber upplýsingagátt á island.is og fræðslugátt Sævars Helga
Íbúar og gestir eru eindregið hvattir til að fylgjast með upplýsingum og fylgja leiðbeiningum frá Seltjarnarnesbæ, stjórnvöldum, lögreglu og viðbragðsaðilum þegar nær dregur. Nánari upplýsingar má finna á upplýsingagátt stjórnvalda um almyrkvann, og á fræðslugátt Sævars Helga Bragasonar um almyrkva á sólu árið 2026. Þar má finna mikið að gagnlegu fræðsluefni sem og gagnvirkt kort sem sýnir nákvæmlega hvar og hvenær myrkvinn sést með því að setja bendil á kortið. Þar kemur einnig fram í hvaða átt skal horfa. Sem dæmi er hægt að setja bendilinn á heimilið sitt og fá þá upp allar upplýsingar um tímalengd og hvar skal staðsetja sig til að vera ekki í skuggavarpi.
Upplýsingagátt stjórnvalda: https://island.is/v/almyrkvi-2026
Fræðslugátt Sævars Helga: https://solmyrkvi2026.is/almyrkvi-a-solu-2026