Gallerí Grótta er sýningarsalur innan Bókasafns Seltjarnarness þar sem haldnar eru listsýningar allt árið um kring. Einnig er um að ræða fjölnotasal fyrir fjölbreytta viðburði, fyrirlestra og fundi auk ýmissa menningartengdra uppákoma fyrir börn og fullorðna.
Að jafnaði eru settar upp um 10 listsýningar í Gallerí Gróttu á hverju ári, salurinn heldur vel utan um hverja sýningu og verkin njóta sín vel. Listamenn geta að sent inn umsókn í gegnum mínar síður um að sýna í Gallerí Gróttu en afar eftirsótt er að sýna þar.
Upplýsingar um fyrirkomulag er gildir um sýningarhald í Gallerí Gróttu má nálgast neðar á síðunni.
Gallerí Grótta er fjölnotasalur bókasafnsins og vettvangur fyrir félags- og menningarlíf bæjarbúa eins og safnið sjálft. Auk listsýninga er salurinn vel nýttur fyrir margskonar viðburði til handa öllum aldurshópum svo sem fyrir bókmenntakynningar, sögustundir, námskeið, fyrirlestra og fundi.
Velkomið er að leigja salinn fyrir minni viðburði, fundi, námskeið o.fl. Hann er um 70 m2 að stærð, búinn skjávarpa og tjaldi auk þess sem honum geta fylgt borð og um 70 stólar. Hægt að fá aðgang að eldhúsi vegna veitinga sé þess óskað. Bókanir á salnum fara fram í gegnum afgreiðslu bókasafnsins auk þess sem nálgast má gjaldskrá vegna útleigu á salnum á vefsíðu safnsins.
Leigja Gallerí Gróttu - Upplýsingar
Salurinn er um 70 m2 að stærð og geta fylgt honum borð og um 70 stólar. Salurinn er leigður út fyrir minni viðburði, fundi, námskeið og fleira og eru í honum skjávarpi og tjald. Einnig er hægt að fá aðgang að eldhúsi vegna veitinga.
Panta má salinn í afgreiðslu Bókasafnsins í síma 5959170.
Salurinn er opinn á afgreiðslutíma safnsins frá 10–18.00 virka daga nema föstudaga frá 10-17 og laugardaga frá 11-14 frá 1. september - 31. maí. Lokað er á laugardögum yfir sumartímann.
Ef óskað er eftir notkun salarins utan hefðbundins opnunartíma má koma óskum um það til starfsfólks.
Leiga á Gallerí Gróttu fylgir gjaldskrá Seltjarnarnesbæjar
Athugið að Gallerí Grótta sýningarsalur er ekki leigður út fyrir myndlistarsýningar.
Fyrirkomulag vegna sýningarhalds í Gallerí Grótta
- Stjórnendur salarins velja sýnendur til sýningarhalds en einnig er hægt að sækja um sýningarhald í salnum
- Sýnendur greiða ekki fyrir sýningarhald í Gallerí Gróttu
- Sýnendum er ekki greitt fyrir sýningarhald
- Sýningar eru á ábyrgð sýnenda og trygging verkanna í þeirra höndum
- Gallerí Grótta tekur ekki þóknun fyrir sölu á verkum sem þar eru til sýnis
- Sýnendur sjá sjálfir um upphengi og niðurtöku í samráði við starfsmenn salarins (helstu áhöld til upphenginga eru á staðnum s.s. naglar, hamar, hallarmál o.fl.)
- Sýnendur standa straum af kostnaði sem kann að felast í uppsetningunni nema um annað sé samið sérstaklega
- Sýnendur skili texta um sýninguna, ferilskrá og myndum í prenthæfri upplausn minnst mánuði fyrir sýningaropnun sem og efnivið í fréttatilkynningu þegar nær dregur sýningu.
- Sýnendur geta fengið rafræn boðskort sem útbúin verða til að bjóða fólki sérstaklega á sýninguna
- Sýnendum er velkomið að láta setja upp límstafi með heiti sýningarinnar á eigin kostnað.
- Sýnendum er velkomið að bjóða upp á eigin veitingar á sýningaropnuninni
- Sýnendum er velkomið að bjóða upp á t.d. tónlistaratriði á sýningaropnunni kjósi þeir það
- Hver sýning er almennt í um það bil 3-4 vikur nema um annað sé sérstaklega samið
- Sýnendur sjá sjálfir um að sparsla í göt og pensla yfir að lokinni sýningu – mögulega heilmála ef uppsetning sýningar hefur verið þess eðlis að ekki dugi að sparsla/pensla (efni og áhöld á staðnum).
- ATH! vanda þarf til verka varðandi frágang.
- Sýnendur þurfa að skila salnum tilbúnum eftir frágang á hádegi mánudeginum eftir sýningarlok.
Eftirfarandi atriði annast stjórnendur salarins
- Upplýsingar um heiti sýningar, listamanns og sýningartíma sett áberandi upp við inngang Gallerí Gróttu
- Hönnun og prentun á staðlaðri sýningarskrá (ein A5 síða) og plakati (stærð A3, 15 stk.) sem dreift er um nágrenni salarins + hönnun verðskrár ef um sölusýningu er að ræða.
- Útsendingu rafrænna fréttatilkynninga og myndefnis til fjölmiðla og á póstlista bókasafnsins þar sem upplýsingum um sýninguna og listamanninn er miðlað áfram. Sýnendur eru hvattir til að senda sjálfir á fjölmiðla og fylgja því eftir eins og þeir kjósa.
- Hönnun og útsendingu á rafrænu boðskorti á póstlista og til tengdra félagasamtaka.
- Gerð viðburðar á Facebook. Sýnendur eru hvattir til að deila honum sem mest.
- Ljósmyndataka á sýningaropnunum í umsjón starfsfólks.
- Aðstoð varðandi léttar veitingar á sýningaropnun kjósi sýnandi að bjóða upp á slíkt. Hafa þarf samráð við starfsfólk varðandi umsýsluna.
Upplýsingar um sal Gallerí Gróttu
- Gallerí Grótta er fjölnotasalur á Bókasafni Seltjarnarnarness og þar fara fram viðburðir og fundir óháð þeirri sýningu sem er í gangi hverju sinni. Mikilvægt að uppsetning sýningar takmarki ekki almenna notkun salarins.
- Kastarar í sal: Kastarar eru á braut í salnum og mikilvægt er að þeir séu ekki teknir niður. Aðeins snúið og stillt (dimmer) m.v. sýningu.
- Sýningarsalurinn Gallerí Grótta er opin skv. opnunartíma bókasafnsins:
- Mánudaga til fimmtudaga 10-18.00
- Föstudaga 10-17
- Laugardaga 11-14 (sept-maí). Lokað á laugardögum á sumrin.
- Ef sýnendur óska þess að hafa sýningaropnun og/eða hafa sýninguna opna á öðrum tímum en á hefðbundnum opnunartímum safnsins þá er það auðsótt en listamenn sjá þá sjálfir um yfirsetu. Umframopnun þarf helst að liggja fyrir áður en kynning á sýningunni fer fram þannig að slíkt geti komið fram á plakati og á boðskorti.
Umsókn um sýningarhald í Gallerí Gróttu fram í gegnum mínar síður hér á vef Seltjarnarnesbæjar.