Fréttir

Seltjörn opnaði í lok apríl og veiddust 98 urriðar fyrsta daginn sem einkenndist af miklum vindi en góðu sólskini. Var stærsti urriðinn sem veiddist um 56 cm langur eða um 4 pund. Þetta var mjög góð byrjun á veiðisumrinu og staðarhaldarar því ánægðir og bjartsýnir á framhaldið en nýlega var sleppt um 3.000 urriðum í vatnið til viðbótar við þá sem sleppt var í fyrra og eru að mestu leyti ennþá í vatninu. Áætlað er að sleppa að minnsta kosti 3.000 urriðum til viðbótar í sumar.

Laugardaginn 8. maí næstkomandi stendur Trimmklúbbur Seltjarnarness (TKS) fyrir Neshlaupinu sem verið hefur árviss viðburður á Seltjarnarnesi um árabil og nýtur mikilla vinsælda meðal götuhlaupara og skemmtiskokkara. Rúmlega 30 félagar í trimmklúbbnum sjá um framkvæmd hlaupsins en að auki er sjúkraþjónusta á bakvakt og lögregla fylgir hlaupurunum í upphafi. Tímataka er í höndum starfsmanns Frjálsíþróttasambands Íslands.

Seltjarnarness í viðskiptaþætti Útvarps Sögu. Í viðtali við Jónmund Guðmarsson bæjarstjóra var farið yfir skipulagsmál og niðurstöður ársreikninga ásamt fleiru fróðlegu. Sækja má þennan hluta þáttarins hér á .wma (8 mb) eða .mp3 (5,5 mb) sniði.

Stjórnendur og starfsmenn leikskóla Seltjarnarness héldu í náms- og kynnisferð til Madrid, höfuðborgar Spánar, á sumardaginn fyrsta. Tilgangur ferðarinnar var m.a. að kynnast leikskólastarfi á Spáni og safna hugmyndum sem nýst geta í starfinu hér heima. Seltjarnarnesbær styrkti þátttakendur til fararinnar með líkum hætti og grunnskólakennara bæjarins er fóru í náms- og kynnisferðir á síðasta ári.

Íbúum Seltjarnarness voru í gærkvöldi kynntar hugmyndir að deiliskipulagi fyrir Hrólfsskálamel og Suðurströnd. Hornsteinar arkitektar ehf., Schmidt, Hammer & Lassen og VSÓ Ráðgjöf unnu hugmyndirnar sem miða að því að hafa blandaða byggð auk knattspyrnuvallar á Hrólfsskálamel en eingöngu íbúðabyggð á Suðurströnd. Tilgangurinn með fundinum var að kynna þessar hugmyndir til að skapa umræðu sem verður innlegg í deiliskipulagið sem unnið verður í framhaldi af fundinum. Fundurinn var vel sóttur en vel á fjórða hundrað manns mættu. Fundargestir fengu tækifæri til að koma athugasemdum eða hugmyndum á framfæri en geta auk þess heimsótt arkitekta og hönnuði til að fá ítarlegri upplýsingar eða til að kynna sín sjómarmið.

Ársreikningur bæjarsjóðs fyrir árið 2003 var samþykktur í bæjarstjórn Seltjarnarness í gær. Niðurstöðutölur bera með sér að stöðugleiki ríkir í rekstri bæjarins og afkoma fer batnandi. Rekstrarniðurstaða bæjarsjóðs er í ágætu samræmi við fjárhagsáætlun, skuldir og skuldbindingar lækka og veltufjárhlutfall styrkist verulega.

Nýverið bauð bæjarstjóri Seltjarnarness foreldraráði Mýrarhúsaskóla til fundar um málefni skólans. Fundurinn var mjög gagnlegur og komu þar ýmsar upplýsingar fram sem varða bæði nemendur og forráðamenn þeirra miklu.

Þær Telma Björk Wilson, Hildur Björg Gunnarsdóttir og Kristín Gunnarsdóttir sem eru nemendur í Valhúsaskóla á Seltjarnarnesi afhentu í vikunni Barna- og unglingageðdeild Landspítalans veglega peningagjöf sem ætluð er til að auðga tómstundastarf innan stofnunarinnar.

Í langtímaáætlun bæjarstjórnar Seltjarnarness er gert ráð fyrir að hafist verði handa við endurbyggingu sundlaugar á tímabilinu sem nær til 2007. Lykilforsenda framkvæmdanna er að deiliskipulag við Hrólfsskálamel og Suðurströnd gangi eins og áætlað er.

Á fjórða hundrað manns lögðu leið sína í Gróttu á laugardaginn í tilefni hins árlega fjölskyldudags í Gróttu. Í þetta sinn var umsjón dagsins í höndum kennara í Tónlistarskóla Seltjarnarness og bar dagskráin nokkurn keim af því.

Tónlistarskólinn á Seltjarnarnesi gengst fyrir fjölskyldudegi úti í Gróttu laugardaginn 17. apríl 2004. Þetta er í þriðja sinn sem slíkur dagur er haldinn en áhugi á útivist í eyjunni hefur farið vaxandi frá því að sérstakur Gróttudagur var haldinn í fyrsta sinn árið 2002.

Stofnanir og fyrirtæki Seltjarnarnesbæjar ásamt vinnuskóla Seltjarnarness munu fjölga ráðningum ungmenna í sumar eins og undanfarin tvö ár til að bregðast við minna framboði á sumarstörfum fyrir ungt fólk. Markmið stjórnenda bæjarins er að tryggja að allir námsmenn í bænum fái vinnu í sumar. Undanfarin vor hefur verið farið í sambærilegar aðgerðir með góðum árangri. Svipaður umsóknarfjöldi hefur borist bænum nú og í fyrra en þá tókst að finna öllum störf er þess þörfnuðust. Sumarstörfum hjá Seltjarnarnesbæ hefur verið fjölgað á síðustu árum og í ár hafa stofnanir og skrifstofur bæjarins lagt áherslu á að ráða ungmenni í sumarafleysingar þar sem því hefur verið komið við. Flest hinna nýju starfa snúa að umhverfismálum og fegrun bæjarins en um 150 unglingar starfa á vegum vinnuskólans í sumar. Auk þess er reiknað með að á þriðja tug ungmenna fái sumarstörf hjá bænum.