Fréttir

Fræðslu- og menningarsvið Seltjarnarness hefur gefið út starfsáætlun fyrir árið 2007. Starfsáætluninni er ætlað vera leiðarljós í starfssemi sviðsins og stofnana þess en áætlun ársins er hluti af langtímaáætlun sem nær til ársins 2010. Við gerð hennar er tekið mið af stefnu bæjaryfirvalda sem endurspeglast til að mynda í skólastefnu og fjölskyldustefnu er samþykktar voru á síðasta ári.

Seltirningar geta borið útgjöld sín vegna fasteignagjalda saman við útgjöld íbúa nokkurra sveitarfélaga á höfuðborgarsvæðinu. Ljóst er að umtalsverðu munar í kostnaði fasteignaeigenda eftir búsetu. Lægst eru gjöldin á Seltjarnarnesi en hæst á Akranesi þar sem munað getur 230% svo dæmi sé tekið af 42 milljón króna eign samkvæmt fasteignamati.

Ættingjar Alberts Þorvarðarsonar fyrrverandi vitavarðar í Gróttu komu færandi hendi til Jónmundar Guðmarssonar bæjarstjóra og gáfu Seltjarnarnesbæ ýmsa hluti sem voru í eigu Alberts s.s. riffil, tóbakshorn, netanálar, ljósmyndir og fleira.

Kjör Íþróttamanns Seltjarnarness fór fram þriðjudaginn 23. janúar sl. að viðstöddu fjölmenni. Kjör Íþróttamanns Seltjarnarness hefur verið árviss viðburður síðan 1993 og er umsjón Æskulýðs- og íþróttaráðs (ÆSÍS), sem vill með þessu vekja athygli á gildi íþrótta, stuðla enn frekar að öflugu íþróttalífi á Seltjarnarnesi og láta íþróttafólk vita að bæjarfélagið styðji við bakið á því.

Jónmundur Guðmarsson, bæjarstjóri á Seltjarnarnesi, tók í dag fyrstu skóflustunguna að nýrri 1.530 fm heilsuræktarstöð World Class sem staðsett verður við hlið Sundlaugar Seltjarnarness. Verklok eru áætluð í september næstkomandi en byggingarkostnaður er áætlaður um hálfur milljarður króna. Landsbankinn annast fjármögnun verksins.

Jóhann Helgason var síðast liðinn laugardag útnefndur bæjarlistamaður Seltjarnarness 2007. Jóhann er löngu landskunnur sem einn fremsti lagahöfundur og flytjandi landsins. Útgefin lög hans og textar eru vel yfir þrjú hundruð talsins, bæði í eigin flutningi og annarra.

Fjárhagsáætlun Seltjarnarness fyrir árið 2007 var samþykkt við seinni umræðu á fundi bæjarstjórnar Seltjarnarness miðvikudaginn 13. desember síðast liðinn. Í henni kemur meðal annars fram að fjárhagur bæjarsjóðs er í traustum skorðum og hefur farið batnandi ár frá ári.

Árið 2007 er annað árið sem álagningarprósenta útsvars á Seltjarnarnesi er sú lægsta á höfuðborgarsvæðinu eða 12,35%. Meðalútsvar á landinu helst óbreytt milli ára eða 12,97% en hámarkið er 13,03% og nýta flest sveitarfélög sér það svigrúm að fullu.

Í samræmi við skipulags- og byggingarlög nr. 73/1997 með síðari breytingum hefur bæjarstjórn Seltjarnarness samþykkt deiliskipulag á Suðurströnd, skóla- og íþróttasvæði.

Í kjölfar samþykktar nýs deiliskipulags skóla- og íþróttasvæðis er bygging nýrrar og glæsilegrar heilsuræktar World Class fyrir Seltirninga á beinu brautinni á grundvelli viljayfirlýsingar bæjarstjórnar Seltjarnarness og Þreks hf. Hönnun hefur staðið yfir frá því í vor og hefjast framkvæmdir núna í janúar.

Nú í byrjun janúar var gengið frá hitalögninni undir gervigrasvellinum og hita hleypt á kerfið. Sérpantaðir forhitarar sem beðið var eftir komu upp úr miðjum desember og var þá hægt að ljúka verkinu. Gervigrasvöllurinn er því orðinn upphitaður sem tryggir að hægt er að spila á honum í nánast hvaða veðri sem er en þess utan er upphitun nauðsynleg til að verja hann skemmdum.

Sérstakur starfshópur skipaður af heilbrigðisráðherra um byggingu hjúkrunarheimilis á Lýsislóð kom saman til fyrsta fundar í upphafi árs. Hópnum er ætlað að vinna að frumáætlun sem lögð verður fyrir fjármálaráðuneytið auk þess að taka ákvarðanir um gerð og framgang húsnæðisins á hönnunartíma.